لاہور( آن لائن )چین میں کرونا وائرس کی وجہ سے پیدا ہونے والی صورتحال اور سفری دشواریوں کے پیش نظر دو روزہ چھٹی کلر اینڈ کیم ایکسپو ملتوی کردی گئی ہے اب یہ ایکسپو 18اور 19جولائی کو لاہور ایکسپو سنٹر میں منعقد ہوگی۔ یہ بات پنجاب ڈائیز اینڈ کیمیکلز مرچنٹس ایسوسی ایشن کے ریجنل چیئرمین اور پنجاب اکنامک کونسل کے چیئرمین خواجہ خاور رشید نے میڈیا سے گفتگو کرتے ہوئے بتائی۔

خواجہ خاور رشید نے کہا کہ چین سے پروازوں کی منسوخی اور سفری دشواریوں کے سبب چینی وفود کی نمائش میں شرکت غیر یقینی ہوگی۔ انہوں نے کہا کہ یہ دو روزہ نمائش ایونٹ اینڈ کانفرنسٹ انٹرنیشنل پرائیویٹ لمیٹڈ، رینبو ڈائی ٹیک اور عالمی پارٹنرز ایشیاڈائی اسٹف انڈسٹری ایسوسی ایشن ، چائنا ڈائی اسٹف انڈسٹری ایسوسی ایشن اور بی ایل جی ای ایکسپو شنگھائی کمپنی کے اشتراک سے 29فروری سے لاہور ایکسپو میں شروع ہونا تھی ۔انہوں نے بتایا کہ چین میں کرونا سے پیدا ہونے والی صورتحال پر غور کے لیے نمائش کے منتظمین کا ایک ہنگامی اجلاس عبدالرحیم چغتائی کی صدارت میں منعقد ہوا جس میں ڈائریکٹر ایونٹ اینڈ کانفرنس راشد الحق اور دیگر پارٹرز بھی شریک ہوئے۔ خواجہ خاور رشید نے کہا کہ اب تک انٹرنیشنل ایئرلائنز نے چین سے لاہور کے لیے فلائٹس کی بحالی کا اعلان نہیں کیا جبکہ چین کی سدرن ایئر لائنز نے بھی لاہور کے لیے اپنی پروازیں منسوخ کررکھی ہیں۔ انہوں نے کہا کہ پاکستان میں کرونا وائرس کا پھیلائو روکنے کے لیے نمائش ملتوی کرنے کا فیصلہ کیا گیا ہے اب یہ 18اور 19جولائی کو لاہور ایکسپو سنٹر میں منعقد ہوگی۔ امید ہے کہ تمام وینڈرز ، وزیٹرز اور نمائش کنندگان اپنا تعاون جاری رکھیں گے۔‎