حافظ آباد (این این آئی)حافظ آبادمیں موٹر وے ایم ٹو پر 2 گاڑیوں میں تصادم کے نتیجے میں 4 افراد جاں بحق اور 10 زخمی ہو گئے۔موٹر وے ایم ٹو پر سکھیکی ریسٹ ایریا کے قریب دو گاڑیوں میں خوفناک تصادم ہوا جس میں 2 بچوں سمیت 4 افراد جاں بحق ہو گئے۔موٹرے وے پولیس کے مطابق بھلوال کے رہائشی خوشی محمد اپنی فیملی کے ہمراہ لاہور سے واپس گائوں جا رہا تھا کہ سکھیکی ریسٹ ایریا کے قریب گاڑی ٹرک سے ٹکرا گئی۔حادثے میں جاں بحق ہونے والے
افراد ایک ہی خاندان کے ہیں جن کی شناخت محمد، عاقب، اسماء اور اقصی کے نام سے ہوئی ہے۔ذرائع کے مطابق حادثے میں 10 افراد زخمی بھی ہوئے ہیں جنہیں تحصیل ہسپتال پنڈی بھٹیاں منتقل کر دیا گیا ۔وزیراعلیٰ پنجاب سردار عثمان بزدارنے ٹریفک حادثے کے نتیجے میں قیمتی انسانی جانوں کے ضیاع پردکھ اورافسوس کا اظہارکرتے ہوئے زخمی ہونے والے افراد کو بہترین طبی سہولتیں فراہم کرنے کی ہدایت کی ہے جب کہ جاں بحق افراد کے لواحقین سے دلی ہمدردی و اظہار تعزیت بھی کی۔
