حطار(آن لائن) خانپور کے دور افتادہ پہاڑی علاقے تھانہ مکھنیال کی حدود کھاریاں گاؤں میں درندگی کا افسوسناک واقعہ، شقی القلب شخص نے بیٹے کے ساتھ مل کر میاں بیوی کو چار معصوم بچوں کے سامنے اندھا دھند فائرنگ کرکے قتل کردیا، چار معصوم بچوں کی رات گئے والدین کی نعشوں کے ساتھ لپٹ کرچیخ وپکار، پورا علاقہ سوگ میں ڈوب گیا،
ہر آنکھ اشک بار،تفصیلات کے مطابق کھاریاں گاؤں کے رہائشی بابا قاسم ولدنور دین اور اسکی اہلیہ عالیہ اپنے چار بچوں کے ہمراہ گھر میں سورہے تھے کہ اشرف اور اسکے بیٹے سیف نے رات دیر گئے گھر میں گھس ہر میاں بیوی کو چارپارئیوں سے اٹھا کر معصوم بچوں کی موجودگی میں اندھا دھند فائرنگ کرکے موت کے گھاٹ اتار دیا، ملزمان ارتکاب جرم کے بعد موقع واردات سے فرار ہونے میں کامیاب ہوگئے واقعہ کی اطلاع ملتے ہی تھانہ مکھنیال پولیس کی بھاری نفری موقع پر پہنچ گئی، اہل محلہ کے مطابق اس اندوہناک واقعہ کے بعد مقتولین کے چار کم سن بچے جن کی عمریں چھ سال سے چھ ماہ تک بتائی جاتی ہیں خون میں لت پت اپنے والدین کی نعشوں کے ساتھ لپٹ کر چیخ وپکار کرتے رہے، اس واقعہ کے بعد پورا علاقہ سوگ میں ڈوب گیا کم سن بچوں کے سامنے والدین کے اندوہناک قتل پر عوام نے شدید احتجاج کرتے ہوئے پولیس سے ملزمان کی فوری گرفتاری کی اپیل کی ہے دوسری طرف کم سن بچوں کو بلکتا دیکھ ہر ہر آنکھ اشک بار ہوگئی،پولیس ذرائع کے مطابق شقی القلب شخص اشرف نے پانچ سال قبل اپنے سگے بھائی لیاقت کو قتل کردیا تھا اور بابا قاسم اپنی اہلیہ اور بچوں کے ساتھ لیاقت کے گھر پر کرائے پر رہ رہے تھے اور گھر کی دیکھ بھال بھی کرتے تھے تھانہ مکھنیال پولیس نے دہرے قتل کا مقدمہ درج کرکے تفتیش شروع کردی ہے۔
