اسلام آباد(این این آئی) حکمراں جماعت پاکستان تحریک انصاف اور حکومتی اتحادی جماعت مسلم لیگ (ق)کے درمیان برف نہ پگھل سکی،(آج)حکومتی اراکین اسلام آباد میں مشاورت کرینگے۔
ذرائع کے مطابق پی ٹی آئی اور مسلم لیگ (ق)کے اختلافات کا معاملہ حل نہ ہوسکا، وفاقی وزیر شفقت محمود نے چوہدری پرویز الہٰی سے ملاقات کی تفصیلات سے حکومتی کمیٹی و دیگر اراکین کو آگاہ کیا جس پر شفقت محمود نے وزیر اعلیٰ پنجاب عثمان بزدار اور گورنر پنجاب چوہدری محمد سرور کو مسلم لیگ ق کے مؤقف سے آگاہ کر دیا تھا۔ذرائع کے مطابق مسلم لیگ ق کے تحفظات پر جمعرات کو حکومتی اراکین اسلام آباد میں مشاورت کریں گے۔ ملاقات میں مسلم لیگ ق، متحدہ قومی موومنٹ (ایم کیو ایم)، گرینڈ ڈیموکریٹک الائنس (جی ڈی اے) اور بلوچستان نیشنل پارٹی (بی این پی) سے کیے گئے وعدوں کی تکمیل کے حوالے سے مشاورت ہو گی۔پنجاب کے معاملات پر گورنر پنجاب چوہدری محمد سرور کی سربراہی میں بننے والی کمیٹی تفصیلات بیان کریگی اور حکومتی جماعت کے اراکین اتحادیوں سے ہونے والے مذاکرات پر کوئی حتمی لائحہ عمل تشکیل دیں گے۔ذرائع کے مطابق حکومتی اراکین کی متفقہ رائے کے بارے میں وزیر اعظم عمران خان کو بریفنگ دی جائی گے اور وزیر اعظم ہی اتحادیوں کے معاملات پر حکومتی کمیٹی کے مشوروں پر کوئی حتمی فیصلہ کریں گے۔
