اسلام آباد(آن لائن) وفاقی وزیر فواد چوہدری نے کہا ہے کہ نوازشریف کو لندن جانے کی اجازت دینا غلط تھا، اب مریم نواز کا بیرون ملک جانا بھی غلط ہوگا،شریف خاندان کو باہر جانا ہے تو پلی بارگین کرکے چلیں جائیں،اتنے ڈراموں کی کیا ضرورت ہے؟۔نجی ٹی وی سے گفتگو کرتے ہوئے انہوں نے کہاکہ نوازشریف کو لندن جانے کی اجازت دینا غلط فیصلہ تھا اور اگر اب مریم نواز کو جانے کی اجازت دی جاتی ہے تو یہ بھی غلط ہو گا کیونکہ بڑے مجرموں کے باہر جانے سے عوام کا آئین و قانون، عدلیہ سمیت پورے حکومتی سسٹم سے اعتماد اٹھ جاتا ہے
اور عام آدمی کو لگتا ہے کہ ملک میں آئین و قانون نام کی کوئی چیز نہیں ہے اور نہ ہی عدالتوں کی کوئی حیثیت ہے۔انہوں نے کہاکہ اگر نوازشریف، مریم نواز یا کسی بھی شریف خاندان کے شخص کو باہر جانا ہے تو وہ پلی بارگین کرکے چلے جائیں اتنے ڈرامے کرنے کی کیا ضرورت ہے۔انہوں نے کہاکہ مریم نواز کو بیرون ملک جانے کی اجازت دینے کا اقدام پاکستان کیلئے اچھا نہیں ہو گا اور اس کے ساتھ ساتھ حکومت کا امیج بھی متاثر ہو گا لہذا ایسے کسی بھی اقدام سے گریز کیا جائے یہی ملک اور سسٹم کے لئے اچھا ہو گا۔
