کراچی (این این آئی) حکومت سندھ نے صوبائی وزراء کے قلمدانوں میں ایک بارپھرتبدیلی کی ہے اورمختلف وزراء کے محکموں میں ردوبدل کیا ہے،وزیراعلی سندھ سید مرادعلی شاہ جن کے پاس بارہ سے زائد قلمدان ہیں نے تعلیم کا محکمہ صوبائی وزیرسعید غنی کے حوالے کردیا ہے اوران سے اطلاعات کا محکمہ واپس لیکرصوبائی وزیرسید ناصرحسین شاہ کودے دیا گیا ہے۔صوبائی وزیرسعید غنی کے
پاس محکمہ تعلیم کے علاوہ لیبراورہیومین رسیورسز کا قلمدان بھی ہوگا جبکہ صوبائی وزیر ناصرحسین شاہ کوجن کے پاس پہلے بلدیات ہاسنگ وٹان پلاننگ،مذہبی امور،جنگلات کے محکمے ہیں انہیں محکمہ اطلاعات سندھ کا قلمدان دے دیا گیا ہے۔حکومت سندھ کے جاری کردہ نوٹیفیکیشن کے مطابق صوبائی وزیرسہیل انورسیال اینٹی کرپشن کا قلمدان واپس لے لیا گیا ہے سہیل انورسیال کے پاس ایریگیشن،محکمہ اوقاف زکو وعشرکے قلمدان رہیں گے جبکہ محکمہ اینٹی کرپشن کا قلمدان جام اکرام دھاریجو کے حوالے کردیا گیا ہے ،صنعت وتجارت،امداد باہمی کا قلمدان بھی ان کے پاس رہے گا۔معتمد ترین ذرائع کا کہنا ہے کہ سعید غنی کومحکمہ تعلیم کا قلمدان پاکستان پیپلزپارٹی کے چیئرمین بلاول بھٹو زرداری کی اس خواہش پردیا گیا ہے کہ وہ اپنی صلاحیتوں سے بند اسکول کھلوانے کے علاوہ سندھ میں تعلیم کے گرتے معیارپرقابوپانے اور تعلیم کا معیار بلند کرنے اورصوبے میں شرح تعلیم میں اضافے کے لیے اپنا کردارادا کریں گے۔سعید غنی کومحکمہ تعلیم کا قلمدان دیے جانے سے قبل ان کی منشا معلوم کی گئی اورانہیں پارٹی قیادت کی جانب سے سندھ میں تعلیمی معیاربلند کرنے کا ہدف بھی دیا گیا ہے۔
