کرا چی (آن لائن) وزیر اطلاعات سندھ سعید غنی نے کہا ہے کہ آئی جی سندھ کی تبدیلی کا فیصلہ وزیراعظم کی رضامندی سے کیا گیا۔صوبائی حکومت اور وفاق آمنے سامنے نہیں ہیں، سعید غنی نے کراچی میں میڈیا سے گفتگو کرتے ہوئے کہا کہ آئی جی سندھ کی تبدیلی کے حوالے سے یہ تاثر غلط ہے کہ وفاق کواعتماد میں نہیں لیا گیا،وزیراعلیٰ نے وزیراعظم سے بات کی تھی۔
وزیراعظم کی جانب سے فیصلے پر رضا مندی کا اظہار کیا گیا ہے۔ ان کا مزید کہنا تھا کہ کچھ اپوزیشن رہنما سمجھ رہے ہیں کہ کسی پارٹی رہنما کا تبادلہ ہورہا ہے، پنجاب ،کے پی اوربلوچستان میں آئی جی تبدیل ہوئے قیامت نہیں آئی ، دیگر صوبوں میں آئی جی تبدیل کئے گئے، اس پر کوئی بڑا ردعمل نہیں ہوا، سندھ میں آئی جی کی تبدیلی پرنہ جانے کیوں زلزلہ سا آجاتاہے۔
