کراچی(نیوز ڈیسک) سابق آرمی چیف پرویز مشرف کے خلاف آرٹیکل 6 کا مقدمہ قائم کرنے کے معاملہ پر سابق وزیراعظم نواز شریف، چوہدری نثار و دیگر کے خلاف درخواست دائر کردی گئی۔ سپریم کورٹ کراچی رجسٹری میں دائر درخواست میں کہا گیا ہے کہ لاہور ہائیکورٹ نے خصوصی عدالت کی تقرری کو ہی غیر قانونی قرار دے دیا ہے، لاہور ہائیکورٹ کے فیصلے سے ثابت ہوا کہ پرویز مشرف کے خلاف کارروائی بدنیتی پر مبنی تھی، سابق وزیراعظم اور موجودہ مجرم میاں محمد نواز شریف کے خلاف سخت کارروائی کی جائے۔
سابق وزیر داخلہ چوہدری نثار علی خان کے خلاف بھی سخت کارروائی کا حکم دیا جائے، سابق سیکریٹری داخلہ شاہد خان کے خلاف بھی غیرآئینی اقدامات کرنے پر سخت فیصلہ دیا جائے،نواز شریف کو واپس وطن لاکر سزا کو مکمل کروانے کا حکم دیا جائے۔ چوہدری نثار علی خان اور مدعا علیان سابق سیکرٹری داخلہ شاہد خان کے نام ای سی ایل میں شامل کیے جائیں، نواز شریف اور چوہدری نثار اور شاہد خان، سیکرٹری وزارت کیبنٹ، حکومت اسلامی جمہوریہ پاکستان و دیگر کو مدعا علہیان کو فریق بنایا گیا ہے۔
