راولپنڈی(این این آئی)چیئرمین پنجاب فوڈ اتھارٹی رکن صوبائی اسمبلی عمر تنویر بٹ نے کہا ہے کہ وزیر اعظم پاکستان عمران خان کے وژن کے مطابق ریاست مدینہ کے خواب کی تعمیر کے لیے پنجاب میں غریب و مساکین اور ضرورت مند افراد کو

پناہ گاہوں میں مفت قیام و طعام کی سہولیات کی فراہمی کے ساتھ ساتھ ”احساس“ پروگرام کے تحت کھانا فراہم کرنے والے ہوٹلوں اور ریسٹورنٹ مالکان کے لیے ایورڈسسٹم کا اجراء کیا جا رہا ہے اور ان کی خدمات کے عوض انہیں پوائنٹس بھی دئیے جائیں گے۔عمر تنویر بٹ نے کہا کہ ملک میں خوراک کا ضیائع روکنے کے لیے اپنی نوعیت کا یہ پہلا قانون ہے۔جس کے تحت اضافی کھانے کے بہترین استعمال کا قانون وضع کیا گیا ہے۔جس کے تحت ہوٹلوں میں فالتو بچ جانے والا کھانا ضائع کئے جانے کی بجائے ان افراد تک پہنچایا جائے گاجواس کے مستحق ہیں۔عمر تنویر بٹ نے کہا کہ ایک سروے کے مطابق پاکستان میں 40فیصد خوراک ضائع ہوجاتی ہے۔اور وزیراعظم پاکستان کے احساس پروگرام کے تحت یہ اضافی خوراک مستحق تک پہنچانے کا نظام وضع کیا گیا ہے۔انہوں نے کہا کہ اس پروگرام سے ہوٹل مالکان کو نیک اور رفاع عامہ کے نیک عمل میں شریک ہونے کے مواقع حاصل ہوں گے اور ان کی خدمات اور جذبے کا اعتراف بھی کیا جائے گا۔