اسلام آباد (این این آئی)وزارت مواصلات نے 11 دسمبر کو جاری کیا جانیوالا موٹرویز اور قومی شاہراوں پر بھاری جرمانے کا نوٹیفکیشن معطل کر دیا۔وزارتِ مواصلات نے موٹروے پولیس اور متعلقہ اداروں کو مطلع کردیا، ٹرانسپورٹرز کے ساتھ حکومت کے کامیاب مذاکرات کے بعد جرمانوں میں اضافہ واپس لیا گیا۔

خیال رہے کہ موٹر ویز اور قومی شاہراہوں پر جرمانے بڑھا کر دس ہزار تک کر دیئے تھے۔ تیز رفتاری پر 10 ہزار، اوور لوڈنگ پر 5 ہزار جرمانہ عائد کیا گیا تھا۔حکومت کی جانب سے ٹریفک قوانین کی خلاف ورزی پرجرمانوں میں بھاری اضافے کے خلاف پبلک ٹرانسپورٹ اینڈ گڈز الائنس نے ملک گیر پہیہ جام ہڑتال کی تھی۔ہڑتال کی وجہ سے لاہور، پشاور، فیصل آباد، گوجرانوالہ اورملتان سمیت دیگر کئی شہروں میں پبلک ٹرانسپورٹ بند رہی،پبلک ٹرانسپورٹ بند ہونے سے مسافروں کو سخت پریشانی کا سامنا رہا اور وہ بھاری بھرکم سامان کے ہمراہ بس اڈوں پہ ہڑتال ختم ہونے کا انتظار کرتے رہے جبکہ پبلک ٹرانسپورٹ کی بندش کے باعث ٹرینوں میں بے پناہ رش بھی دیکھنے میں آیا۔گورنرپنجاب چودھری محمد سرور نے آل پاکستان ٹرانسپورٹرز اینڈ گڈز کے نمائندہ وفد سے مذاکرات کیے اور انہیں مسائل کے حل کی یقین دہانی کرائی تھی۔انہوں نے کہاکہ ٹرانسپورٹرز کو درپیش مسائل کے حل کے لیے حکومت چار رکنی کمیٹی بنائے گئی جو ٹرانسپورٹرز کی چار رکنی کمیٹی سے مذاکرات کرکے مسائل کا حل تلاش کریگی۔