لاہور (آن لائن) صوبائی وزیر ہائوسنگ میا ں محمود الرشید نے کہا کہ وزیر اعظم پاکستان کے ویژن کے مطابق صوبے میں کم آمدنی والے افراد کیلئے سستے گھروں کی تعمیر کیلئے حکومت پنجاب ترجیحی بنیادوں پر اقدامات کر رہی ہے اور اس سلسلے میں تمام قانونی تقاضے پورا کرنے کے بعد تعمیراتی کام جلد شروع کر دیاجائے گا۔چیف سیکرٹری پنجاب میجر (ریٹائرڈ) اعظم سلیما ن خان نے
نیا پاکستان منصوبے پر کام کی رفتار تیز کرنے سے متعلق ہدایات جاری کرتے ہوئے کہا کہ اس سلسلے میںکسی قسم کی کو تاہی برداشت نہیں کی جائے گی۔ صوبائی وزیر میاں محمود الرشید اور چیف سیکرٹری پنجاب نے سستے گھروں کی تعمیر کے سلسلے میں نجی شراکت داری کی حوصلہ افزائی کرنے پر اتفاق کرتے ہوئے فیصلہ کیا کہ تمام متعلقہ ادارے سرمایہ کاروں کو ہر قسم کی سہولیات فراہم کریں گے۔ اجلاس میں منصوبے پر تفصیلی بریفنگ دیتے ہوئے سیکرٹری ہائوسنگ ندیم محبوب نے بتایا کہ فیز ون اور ٹو کے پی سی ون منظور ہو چکے ہیں جبکہ فیز ون کے تحت چھ اضلاع اوکاڑہ، لودھراں، بہاولنگر، بھکر، لیہ اور خوشاب میںقرعہ اندازی کا عمل مکمل کر لیا گیا ہے ۔ان اضلاع میںکل 4420پلاٹ مختص کئے گئے ہیں اور اس سلسلے میں صرف ضلع اوکاڑہ میں 859، لودھراں میں 893، بہاولنگر میں 1144، بھکر میں189، لیہ میں124اور خوشاب میں 1211پلاٹ رکھے گئے ہیں۔اجلاس میں فیز ٹوکے تحت تعمیر کئے جانیوالے اپارٹمنٹس، گھروں اور تقسیم کئے جانیوالے پلاٹو ں پر پیش رفت کا بھی تفصیلی جائزہ لیا گیا۔ سیکرٹری ہائوسنگ نے اجلاس کو بتایا کہ فیصل آباد میں 192 اپارٹمنٹس، ملتان میں 384، اور لیہ میں فیز ون میں 89اور فیز ٹو میں 73، جوہر آباد میں 147، لیاقت آباد میں 250گھر تعمیر کئے جائیں گے جبکہ پتوکی میں 545اور حضرو میں 589پلاٹ کم آمدن والے افراد کیلئے مختص کئے گئے ہیں۔اجلاس میں محکمہ ہائوسنگ کے ایڈیشنل سیکرٹریز ، ڈائریکٹر جنرل پنجاب ہائوسنگ اینڈ ٹائون پلانگ ایجنسی (فاٹا) اور متعلقہ افسران نے شرکت کی۔
