پسنی (این این آئی)بلوچستان کے علاقے پسنی کے قریب سیاحتی جزیرے استولہ میں نئے سال کا جشن منانے کیلئے جانے والے متعدد افراد پھنس گئے۔ایڈیشنل ڈپٹی کمشنر گوادر انیس گورگیج کے مطابق جزیرہ استولہ میں 10 سے زائد افراد کے پھنسے ہونے کی اطلاعات ہیں، ابتدائی اطلاعات کے مطابق پھنسے ہوئے افراد میں وکلاء بھی شامل ہیں۔انہوں نے بتایا کہ اطلاعات کے مطابق پھنسے ہوئے افراد 31 دسمبر کو نیا سال منانے استولہ گئے تھے اور اب سمندر میں طغیانی کی وجہ سے جزیرے سے واپس پسنی
نہیں پہنچ سکے۔ایڈیشنل ڈپٹی کمشنر کے مطابق سمندری ہواؤں اور تیز لہروں کے باعث جزیرے تک رسائی میں مشکل پیش آرہی ہے، استولہ پر جانے کے لیے متاثرہ افراد نے این او سی بھی نہیں لیا تھا۔آخری اطلاعات تک جزیرے میں پھنسے ہوئے افراد نے اپنے گھرو والوں سے رابطہ کرکے صورتحال سے آگاہ کیا ہے جس کے بعد انہیں جزیرے سے بحفاظت واپس لانے کے انتظامات کر ناشروع کر دیئے گئے۔آخری اطلاعات کے مطابق جزیرہ استولہ میں پھنسے افرادکو بحفاظت ساحل پر پہنچا دیا گیاہے۔
