اسلام آباد (این این آئی)سیکرٹری جنرل جے یو آئی (ف) مولانا عبدالغفور حیدری نے کہا کہ دھرنے کا بنیادی عنوان دھاندلی ہے،پس پردہ قوتوں نے نالائق حکمران کو عوام پر مسلط کیا،عمران خان نے ختم نبوتؐ پر نقب ڈالنے کی کوشش کی،عوام کو بھکاری بنادیا،بجلی گیس اور اشیاء خورونوش کی قیمت آسمان سے باتیں کر رہی ہیں،حکومت کی رٹ ختم ہوچکی،پورا ملک مولانا فضل الرحمن کے حکم پر بند ہے،
ابھی آغاز کیا ہے،رفتہ رفتہ ملک کی شاہراؤں کو مکمل بند کرینگے،مقتدر قوتیں حکومت کا ساتھ نہ دیں ہمیں مقابلہ کرنے دیں۔موٹر وے چوک پر دھرنا کے شرکاء سے خطاب کرتے ہوئے سیکرٹری جنرل جے یو آئی (ف) مولانا عبدالغفور حیدری نے کہا کہ دھرنے کا بنیادی عنوان دھاندلی ہے،پس پردہ قوتوں نے نالائق حکمران کو عوام پر مسلط کیا۔انہوں نے کہا کہ مولانافضل الرحمن نے اعلان کیا کہ ہم الیکشن کو تسلیم نہیں کرتے،اے پی سی میں اتفاق کیا گیا کہ 2018 کے الیکشن میں دھاندلی ہوئی۔انہوں نے کہا کہ امریکی مغربی اور بھارت کے غلام نے ختم نبوت ؐترمیم کرنے کی کوشش کی،آسیہ کو موجودہ حکومت نے آزاد کرواکر باہر بھجوایا۔انہوں نے کہا کہ عبدالشکور قادیانی کو جیل سے آزاد کرواکر ٹرمپ سے ملاقات کروائی گئی۔انہوں نے کہا کہ عمران خان نے ختم نبوتؐ پر نقب ڈالنے کی کوشش کی اور عوام کو بھکاری بنادیا۔انہوں نے کہا کہ ڈالر کی قیمت ٹماٹر سے کم ہے،وزیر کہتے ہیں کہ ٹماٹر 17 روپے کلو ہے۔انہوں نے کہا کہ بجلی گیس اور اشیاء خورونوش کی قیمت آسمان سے باتیں کر رہی ہیں،حکومت کی رٹ ختم ہوچکی ہے پورا ملک مولانا فضل الرحمن کے حکم پر بند ہے،ہم نے آج آغاز کیا ہے رفتہ رفتہ ملک کی شاہراؤں کو مکمل بند کرینگے۔ انہوں نے کہا کہ ہماری مجبوری ہے کہ اس حکومت کا لاک ڈاؤن کیا جائیگا۔ انہوں نے کہا کہ پلان بی میں عمران خان کو بھگا کر دم لیں گے،جو لوگ ہمیں چھوٹی جماعت کا طعنہ دیتے تھے آزادی مارچ میں 16،17 لاکھ کا مجمع تھا۔
انہوں نے کہا کہ حکومت اٹک پل کو بند کرنے کا کہتی تھی کل ہم اٹک پل بند کرکے دیں گے،حکومت اداروں سے کام نہ لیں ہم سے کشتی کر کے دیکھیں۔انہوں نے کہا کہ مراد سعید کا منہ بند کریں گے،مراد سعید کا ایک راستہ کھلا ہوگا۔انہوں نے کہا کہ عمران خان کا استعفیٰ اور الیکشن تک تحریک چلتی رہی گی،مقتدر قوتوں کو کہتا ہوں کہ حکومت کا ساتھ نہ دیں ہمیں مقابلہ کرنے دیں۔مولانا غفور حیدری کا (آج) گیارہ بجے کارکنان کو 26 نمبر چونگی پہنچے کی ہدایت کرتے ہوئے کہا کہ (آج) نماز جمعہ 26 نمبر چونگی پر ادا کی جائیگی۔امیر جے یو آئی (ف) اسلام آباد نے ڈاکٹر ضیاء الرحمن نے کہا ہے کہ مقتدر قوتوں کو کہنا چاہتا ہوں کہ ووٹ کو عزت دو،عوام اس وقت تک چین تک نہیں بیٹھے گی جب سلیکٹڈ کو ریجیکٹ نہ کردیں۔ انہوں نے کہا کہ ہمارے اوپر موجودہ حکمرانوں کو مسلط کیا گیا ہے۔بعدازاں کارکنان 26 نمبر چونگی سے پرامن منتشر ہوگئے۔
