لاہور(این این آئی)لاہورہائیکورٹ نے جمعیت علمائے اسلام (ف) کے سربراہ مولانا فضل الرحمن کی گرفتاری اور بغاوت کی کاروائی کے لیے دائر متفرق درخواست پر وفاقی حکومت کونوٹس جاری کرتے ہوئے جواب طلب کر لیا ۔ لاہور ہائیکورٹ کے سنگل بنچ نے ایڈوکیٹ ندیم سرور کی درخواست پر سماعت کی۔ درخواست گزار نے موقف اپنایا کہ مولانا فضل الرحمان اپنی تقاریر سے لوگوں کو اکسا رہے ہیں جس سے ملک میں انتشار پھیلنے کا خدشہ ہے۔مولانا فضل الرحمان نے بیان دیا ہے کہ آزادی مارچ کے شرکا ء
وزیر اعظم ہاؤس جا کر وزیر اعظم عمران خان کو گرفتار کر سکتے ہیں۔لوگوں کو ریاست کے خلاف اکسانا بغاوت کے زمرے میں آتا ہے۔استدعا ہے کہ مولانا فضل الرحمان کو گرفتار کر کے انکے خلاف بغاوت کی کارروائی کا حکم دیا جائے۔فاضل عدالت نے ریمارکس دئیے کہ کسی قسم کی ملک منافی سرگرمیوں کو روکنا حکومت کی زمہ داری ہے، مذکورہ معاملے میں حکومت پاکستان اپنا موقف عدالت میں جمع کرائے جس کے بعد کارروائی کو آگے بڑھایا جائے گا۔
