اسلام آباد (مانیٹرنگ ڈیسک) معروف صحافی و تجزیہ کار نجم سیٹھی نے ایک نجی ٹی وی چینل کے پروگرام میں دعویٰ کرتے ہوئے کہا کہ آج پھر الیکشن کرا لیں، نواز شریف جیت جائیں گے، انہوں نے انکشاف کرتے ہوئے کہا کہ ڈیل کی آفر ضرور ہو رہی ہے مگر نواز شریف کی طرف سے ڈیل کی آفر نہیں بلکہ اسٹیبلشمنٹ کی طرف سے ہو رہی ہے، نجم سیٹھی نے کہا کہ اس ڈیل کے دو مقاصد ہیں،
ایک یہ کہ میاں نواز شریف یہ تسلیم کرلیں کہ وہ کرپٹ ہیں کیونکہ کرپٹ لوگ ہی تو ڈیل لیتے ہیں اور دوسرا یہ کہ میاں نواز شریف چپ چاپ بیٹھ جائیں، نجم سیٹھی نے کہا کہ دیکھا جائے گا کہ کیا ہوتا ہے، انہوں نے مزید کہا کہ جو پولیٹیکل انجینئرنگ پہلے کی ہے اس کو مزید مضبوط کیا جائے گا، انہوں نے مزید دعویٰ کرتے ہوئے کہا کہ ایک تھیوری یہ بھی ہے کہ میاں نواز شریف کے پاس جیل سپرنٹنڈنٹ گیا اور ان سے کہا کہ ابھی درخواست دیں ہم آپ کو ہسپتال منتقل کردیتے ہیں آپ وہاں سے پھر ایک اور درخواست دینا اس سے آپ کی رہائی ہوجائے گی، اور ای سی ایل سے آپ کا نام بھی نکال دیا جائے گا، یہ فیصلہ بھی ہم عدالتوں سے کروالیں گے آپ پھر بیرون ملک چلے جانا، لہذا آپ ڈیل کریں اور چلے جائیں پھر واپس آ جانا یہ ڈیل کون سی کوئی ڈیل ہے لیکن اس کے برعکس آپ جیل میں ساری عمر بیٹھے رہیں گے، نجم سیٹھی نے مزید دعویٰ کرتے ہوئے کہا کہ ڈیل کی آفر اس لیے ہو رہی ہے کہ عمران خان کی حکومت نہیں چل رہی، حالات خراب ہو رہے ہیں اور ان کا ووٹ بنک بھی گر رہا ہے، نجم سیٹھی نے کہا کہ میاں نواز شریف ڈٹ کے بیٹھے ہیں، میاں صاحب اور ان کی جماعت کی کریڈیبیلٹی میں اضافہ ہو رہا ہے، نجم سیٹھی نے کہا کہ لوگ دلیر آدمی کو پسند کرتے ہیں، پہلے بھی الیکشن جیت چکے تھے آج پھر الیکشن کرا لیں جیت جائیں گے۔
