لاہور( این این آئی)محکمہ ریلوے کی جانب سے قرعہ اندازی کے ذریعے بھرتیاں کرنے کے بعد دوسرے سرکاری محکمے بھی اس کی پیروی کرنے لگے ۔محکمہ ریلوے کو چند ہزار آسامیوں پر بھرتیوں کیلئے کئی لاکھ درخواستیں موصول ہوئیں تھیں جس کے بعد کابینہ نے قرعہ اندازی کے ذریعے بھرتی کرنے کی منظوری دی تھی ۔
اب اسلام آباد الیکٹرک سپلائی کمپنی کی جانب سے بھی ریلوے کی پیروی کی گئی ہے او ر گریڈ ایک تا 5کے لئے قرعہ اندازی کی جائے گی ۔ آئیسکو کے مطابق ALMکی آسامی کے لئے امیدوار وں کو قرعہ اندازی میں شامل ہونے سے پہلے سکل ٹیسٹ پاس کرنا ہوگا اور اس کے علاوہ فزیکل سٹینڈرڈ ز/فزیکل پیرا میٹرز ٹیسٹ پر پورا اترنا ہوگا۔
