لاہور(این این آئی) پیپلز پارٹی پنجاب نے بھی سرکاری ہسپتالوں کی بالواسطہ نجکاری کو مسترد کرتے ہوئے کہا ہے کہ غریبوں سے علاج اور ٹیسٹوں کی مفت سہولت واپس لینا ظلم ہے۔ پنجاب کے جنرل سیکرٹری چوہدری منظور احمد نے کہاکہ سلیکٹڈ حکومت نے پہلے مرحلے پر او پی ڈی کی مفت سہولیات ختم کی۔حکمران اگلے مرحلے پر ایمرجنسی کیلئے بھی مفت سہولیات ختم کرنے والے ہیں۔ انہوں نے کہاکہ تجارت پیشہ بورڈ آف ڈائریکٹر

مسلط کرکے پروفیشنل ڈاکٹرز کو بے وقعت کیا جا رہا ہے۔سرکاری ہسپتالوں کو نجی ہسپتالوں کے سفاک ما حول میں بدلنے کی سازش ہو رہی ہے۔ انہوں نے کہا کہ اس قانون سے ینگ ڈاکٹرز اور پیرامییڈکس کی نوکریاں بھی خطرے میں پڑ گئی ہیں۔یہ ظالمانہ قانون پنجاب اسمبلی سے منظوری کے بغیر نافذ کیا گیا۔پیپلز پارٹی اس سفاکانہ اقدام کے خلاف پنجاب اسمبلی میں بھرپور احتجاج کرے گی اور اس قانون کیخلاف احتجاج کیلئے جلد لائحہ عمل کا اعلان کرے گی۔