لاہور (آن لائن) پنجاب حکومت نے لاہور سمیت صوبے بھر کے ٹیچنگ ہسپتالوں کی نجکاری کو نوٹیفکیشن جاری کر دیا ہے۔ جس کے بعد صوبے بھر کے سرکاری ٹیچنگ ہسپتالوں میں کام کرنے والے ڈاکٹروں، نرسوں اور پیرا میڈیکس کی بطور سرکاری ملازمت کا درجہ ختم ہو گیا ہے جبکہ تمام ٹیچنگ ہسپتالوں کے انتظامی اختیارات ان ہسپتالوں کے بورڈ آف گورنرز کو سونپ دئیے ہیں۔

صوبے بھر کے سرکاری ٹیچنگ ہسپتالوں کی سرکاری حیثیت گورنر پنجاب چوہدری محمد سرور کی منظوری کے بعد ایک آرڈنینس کے ذریعے ختم کی گئی ہے جبکہ دوسری طرف ینگ ڈاکٹرز ایسوسی ایشن کے گرینڈ ہیلتھ الائنس نے آج بروز بدھ صوبے بھر میں ہڑتال کی کال دیتے ہوئے 6 ستمبر کو گرینڈ ہیلتھ الائنس کا اجلاس طلب کر لیا ہے۔ حکومتی اقدام پر وائی ڈی اے راہنما ڈاکٹر عامر کا کہنا ہے کہ پنجاب حکومت نے اس حوالے سے بل کی منظوری میں ناکامی کے بعد ایم پی آئی ایکٹ کو نافذ کرنے کے لئے آرڈیننس کا سہارا لیا ہے۔ ایم پی آئی ایکٹ جو عوام دشمن ہے کی وجہ سے مریضوں کو سخت نقصان کا سامنا کرنا پڑے گا۔ سرکاری ٹیچنگ ہسپتالوں میں طبی سہولتیں مہنگی ہو جائیں گی۔ لہٰذا وہ اس ایکٹ کو کسی سطح پر بھی منظور نہیں ہونے دیں گے۔ دوسری طرف پاکستان مسلم لیگ (ن) نے پنجاب کے ٹیچنگ ہسپتالوں کی نجکاری کیخلاف آرڈیننس کے اجراء کو چیلنج کرنے کا اعلان کرتے ہوئے کہا ہے کہ پنجاب حکومت نے رات گئے ڈاکٹروں،نرسوں اوردیگر عملے سمیت مریضوں کے حق پر شب خون مارا ہے۔ اپنے بیان میں انہوں نے کہا کہ منتخب لوگ چوروں ڈاکوں کی طرح عوام کے حقوق پر ڈاکہ نہیں مارتے،مہنگائی،بیروزگاری اور غربت کے بعد حکومت نے عوام سے مفت علاج معالجے کی سہولت بھی چھین لی ہے۔ عظمیٰ بخاری نے کہا کہ ٹیچنگ ہسپتالوں میں پرنسپل اور ایم ایس کا عہد ہ ختم کرنے کا مقصد ہسپتالوں کو بھی سیاسی اکھاڑہ بنانا ہے،

پنجاب کے ہسپتالوں میں فری علاج معالجہ کا اختیار بورڈآف گورنرکو دینے کا مطلب وزراء،مشیروں اورخواریوں کے ہی مفت علاج ہوں گے۔ انہوں نے کہا کہ حکومت اپنی ذمہ داریوں سے راہ فرار تلاش کررہی ہے۔مسلم لیگ (ن) کے دور حکومت میں ینگ ڈاکٹرز اور نرسیں ہماری حکومت کے اچھے فیصلوں کیخلاف بھی سڑکوں پر ہوتے تھے۔ینگ ڈاکٹرز اور نرسوں نے بھی تبدیلی سرکاری کی اصلیت دیکھ لی ہو گی۔انہوں نے کہا کہ مسلم لیگ (ن)ٹیچنگ ہسپتالوں کی نجکاری کا آڈریننس چیلنج کرے گی،رات کے اندھیرے میں بننے والی حکومت چھپ چھپ کر عوام کے حقوق پر ڈاکے مار رہی ہے۔