اسلام آباد (این این آئی)وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ پیپلز پارٹی میں سے اب عوام مائنس ہوچکے ہیں، موروثی سیاست کے وارثوں کو کرپشن سے بنائے گئے ورثے اور اس کے تحفظ کی فکر ہے،بلاول صاحب! آپ کی جمہوریت قوم کا مال اڑاؤ اور

باہر پہنچاؤ ہے۔اتوار کو ٹوئٹر پر اپنے بیان میںانہوںنے کہاکہ پیپلز پارٹی میں سے اب عوام مائنس ہوچکے ہیں۔ انہوں نے کہاکہ موروثی سیاست کے وارثوں کو کرپشن سے بنائے گئے ورثے اور اس کے تحفظ کی فکر ہے۔ انہوںنے کہاکہ آپ نے آج بھی کشمیر کاز پر سیاست کی۔ عظیم کشمیریوں کی جدوجہد کا آپ کی ابو بچاؤ مہم سے کیا موازنہ۔ انہوںنے کہاکہ عمران خان پاکستان کا روشن چہرہ ہے۔ انہوں نے کہاکہ ان پر نہ تو کوئی کرپشن کا داغ ہے اور نہ ہی آپ کے خاندان کی طرح قوم کا مال ہڑپ کر کے دولت جمع کرنے کا لالچ ہے ۔انہوںنے کہاکہ مودی کے سیاہ اور یکطرفہ اقدام دنیا مسترد کر چکی ہے،سلامتی کونسل میں کشمیریوں کی آواز کی گونج بھارت کی شکست ہے۔ انہوںنے کہاکہ بلاول صاحب! آپ کی جمہوریت قوم کا مال اڑاؤ اور باہر پہنچاؤ ہے، سندھ میں آپکے 11سالہ کرپٹ راج نے غریب عوام کے حقوق چھین لیے ہیں۔ ڈاکٹر فردوس عاشق اعوان نے کہاکہ کراچی آج کچرا کنڈی بنا چکا ہے،جبکہ آپ کی حکومت کی کارکردگی کی قیمت سندھ کے معصوم بچے اپنی جانیں دے کر ادا کر رہے ہیں۔