لاہور(نیوزڈیسک)صوبائی وزیر صحت پنجاب ڈاکٹر یاسمین راشد نے اپنی ہی بنائی این جی اوز کو لاکھوں روپے کی گرانٹ جاری کردی۔نجی ٹی وی نے دستیاب دستاویزات کا حوالہ دیتے ہوئے بتایا ہے کہ صوبائی وزیر صحت ڈاکٹر یاسمین راشد نے تھیلیسمیا سوسائٹی آف پاکستان اور الزائمر سوسائٹی آف پاکستان کے لیے لاکھوں روپے گرانٹ تجویز کی۔

تھیلیسیمیا سوسائٹی آف پاکستان کے لیے رواں مالی سال کے لئے70 لاکھ روپے کی گرانٹ رکھی گئی ہے۔تھیلسیمیا سوسائٹی آف پاکستان کو گزشتہ مالی سال میں بھی 70 لاکھ روپے ملے۔ الزائمرسوسائٹی آف پاکستان کے لیے بھی 5 لاکھ روپے 2018-19 میں رکھے گئے تھے۔واضح رہے کہ ڈاکٹر یاسمین راشد ان سوسائٹیز کی پیٹرن انچیف ہیں جبکہ پاکستان تحریک انصاف کی رہنما عندلیب عباس 70 لاکھ گرانٹ حاصل کرنے والی سوسائٹی کی وائس پریذیڈنٹ ہیں۔یہ بات بھی انتہائی قابل غور ہے کہ تھیلیسیمیا سوسائٹی آف پاکستان اور الزائمرزسوسائٹی آف پاکستان کے دفاتر یاسمین راشد کے ذاتی کلینک کے پتے پر رجسٹرڈ ہیں۔ دونوں این جی اوز کے دفاتر شادمان لاہور میں جیل روڈ پر واقع یاسمین راشد کے کلینک کے اندر ہی قائم ہیں۔ڈاکٹر یاسمین راشد نے نجی ٹی وی کو دئیے گئے موقف میں کہاہے کہ سوسائیٹیز کے دفاتر وزارت ملنے سے پہلے ہی انکے کلینک کے پتہ پر رجسٹرڈ ہیں۔انہوں نے کہا کہ (ن) لیگ کے دور حکومت میں بھی تھیلیمسیا سوسائٹی کو گرانٹ ملتی رہی ہے۔ وزارت ملنے کے بعد انکا عملی طور پر دونوں این جی اوز کے کاموں میں عمل دخل نہیں۔