اسلام آباد (این این آئی) پاکستان مسلم لیگ (ن) کے صدر و قومی اسمبلی میں اپوزیشن لیڈر محمد شہباز شریف نے جیل میں میاں نواز شریف کا پرہیزی کھانا روکے جانے کی شدید مذمت کرتے ہوئے کہا ہے کہ نواز شریف دل کے عارضے میں مبتلا ہیں، بیماری کی حالت میں ان کو گھر کے کھانے سے محروم کرنا بہت بڑا ظلم ہے،ظلم سے ہمارے حوصلے نہیں توڑے جاسکتے۔ ایک بیان میں صدر مسلم لیگ (ن) محمد شہباز شریف نے جیل میں سابق وزیراعظم محمد نواز شریف کا پرہیزی کھانا روکے جانے کی شدید مذمت کرتے ہوئے کہا ہے کہ میاں محمد نواز

شریف دل کے عارضہ میں مبتلا ہیں ان کا پرہیزی کھانا گھر سے آتا ہے،میاں محمد نواز شریف کو بیماری کی حالت میں گھر کے کھانے سے محروم کرنا بہت بڑا ظلم ہے۔ انہوں نے کہا کہ پی ٹی آئی کی حکومت انتقام کی آخری حد تک جا چکی ہے۔ انہوں نے کہا کہ عمران خان سن لو، اس ظلم سے تم ہمارے حوصلے نہیں توڑ سکتے، ہمارے حوصلے بلند ہیں۔ انہوں نے کہا کہ میاں محمد نواز شریف اس ملک کے تین بار وزیر اعظم رہے، اْن کے ساتھ غیر انسانی سلوک انتہائی قابل افسوس ہے۔ انہوں نے کہا کہ محمد نواز شریف تک فی الفور گھر کے کھانے کی فراہمی کو یقینی بنایا جائے۔