لاہور ( این این آئی) قومی احتساب بیورو (نیب ) نے پنجاب اسمبلی میں قائد حزب اختلاف و مسلم لیگ (ن) کے مرکزی رہنما حمزہ شہباز کی طرف سے ڈی جی نیب لاہور پر لگائے گئے الزامات کو مسترد کرتے ہوئے اسکی سختی سے تردید اور مذمت کی ہے ۔ نیب اعلامیے میں کہا گیا ہے کہ ڈی جی نیب لاہور نے اپنی ڈگری کے بارے میں حمزہ سے کبھی کوئی بات نہیں کی ،
اگر انہوں نے ایسی بات کی بھی تھی تو حمزہ شہباز اس وقت کیوں خاموش رہے ، یہ سب کچھ کھسیانی بلی کھبا نوچنے کے مترادف ہے ، اس کے علاوہ اب جب نیب کو حمزہ شہباز اور انکی فیملی کی مبینہ منی لانڈرنگ ، آمدن سے زائد اثاثوں کے بارے میں مبینہ طور پر ٹھوس ثبوت ملے ہیں تو ا حمزہ شہباز بے بنیاد ، من گھڑت ، جھوٹے اور لغو الزامات کے ذریعے نیب کی قانون کے مطابق تحقیقات پر اثر انداز ہونے کی کوشش کررہے ہیں ۔ جہاں تک ڈی جی نیب کی ڈگری کا تعلق ہے تو ہائر ایجوکیشن کمیشن پہلے ہی اس کی تصدیق کر چکی ہے اور اسکی رپورٹ معزز سپریم کورٹ آف پاکستان میں جمع کروائی جا چکی ہے ۔اعلامیے میں کہا گیا ہے کہ نیب اس بات کو بھی یکسر مسترد کرتا ہے کہ اس پر حکومت کا کوئی دباؤ ہے ، نیب ایک مختار ادارہ ہے جو قانون کے مطابق اپنے فرائض انجام دینے پر یقین رکھتا ہے ۔ نیب چادر ، چار دیواری اور خواتین کا احترام کرتا ہے ، شریف فیملی کی خواتین کو بلانے کا مقصد دراصل اسٹیٹ بینک آف پاکستان کی طرف سے موصول شکایت کی روشنی میں تحقیقات کرنا ہے جس کے مطابق شریف فیملی کے اکاؤنٹس میں خطیر رقم کی مبینہ منی لانڈنگ ہوئی ہے ۔ نیب امید کرتا ہے کہ حمزہ شہباز نیب پر بے بنیاد الزامات لگانے کی بجائے اپنے خلاف مبینہ تحقیقات کا جواب پیش کریں کیونکہ نیب کسی دباؤ کی پرواہ کیے بغیر قانون کے مطابق اپنا کام جاری رکھنے پر یقین رکھتا ہے اور احتساب سب کے لئے کی پالیسی پر سختی سے عمل پیرا ہے ۔
