چنیوٹ (آن لائن)چنیوٹ پولیس کا ایک اور انوکھا کارنامہ اور انوکھی گرفتاری،چنیوٹ پولیس بھی دشمن ملک بھارت کی روش پر چل نکلی ،غریب مزدور کے گھرپر مبینہ چھاپہ خواتین سے بدتمیزی گالم گلوچ اور دھکے مار کر کبوتر کو گرفتار کرلیا ۔
متاثرہ خاندان نے وزیر اعلیٰ پنجاب سے نوٹس لینے کا مطالبہ کر دیا ۔بتایا گیا ہے کہ ضلع چنیوٹ چوکی دل خوشاب پولیس نے چنیوٹ کے علاقہ محلہ توحید آباد میں غریب مزدور کے گھر پر اچانک دھاوا بول دیا۔ متاثرہ خاندان کے مطابق پولیس نے چادر اور چاردیواری کا تقدس پامال کر دیا۔پولیس ملازمین مبینہ طور پر گھر میں موجود خواتین بچوں سے بدتمیزی دھکے گالم گلوچ کرتے رہے۔ پولیس والے زبردستی گھر میں گھسنے کے بعد چھت پر چڑھے اور کبوتروں کے کھڈے میں موجود دو بچوں کا باپ کبوتر گرفتار کرکے لے گئے۔اہل خانہ اور علاقہ مکینوں کے پوچھنے پر پولیس ملازمین کا کہنا تھا کہ کبوتر کی گرفتاری کیلئے افسران کا حکم ہے۔ہمارا کبوتر رہا کرکے واپس کیا جائے وزیر اعلیٰ واقعہ پر نوٹس لیں۔متاثرہ خاندان کا مطالبہ کیاہے تاہم چنیوٹ پولیس کے اعلیٰ افسران نے واقعہ سے متعلق لاعلمی کا اظہار کیاہے۔
