اسلام آباد ( آن لائن) مسلم لیگ ن کے رانا محمد افضل خان نے کہا ہے کہ وزیر اعظم عمران خان نے اپنی تقریر میں اوور ریکشن کیا ہے۔نجی ٹی وی سے گفتگو کرتے ہوئے رانامحمد افضل خان نے کہا کہ آخر کار ہم کو ہندوستان کے ساتھ اپنے تعلقات بہتر بنانے ہیں ، ہم اپنے ہمسائے بدل نہیں سکتے ، ہندوستا ن پہلے دن سے ہی ہمارا دشمن ہے اوراس نے ہمیں وجود میں آنے سے لیکر ہی تسلیم نہیں کیا۔انہوں نے کہا کہ ہمیں دیکھنا یہ ہے کہ کیا انڈیا واقعی حملہ کرنے کے موڈ میں ہے ،
کیا وہ واقعی ایسی صورتحال بنا رہا ہے۔ ان کا کہنا تھا کہ وزیر اعظم عمران خان نے اپنی تقریر میں اوور ریکشن کیاہے ، ان کی تقریر آخری آپشن ہونا چاہئے تھا ، ہم نے کلبھوشن کے خلاف ایک پورا ڈوزیئر دیا تھا ، اگر یہ بات کی جاتی ہے کہ یہ فوج نے دیا تھا تو پھر عالمی عدالت انصاف میں بھی فوج ہی گئی ہوگی۔ انہوں نے کہاکہ کلبھوشن کا ایشو وزیر اعظم کی سطح کا نہیں تھا ، یہ دفتر خارجہ کی سطح کا تھا ، ہندوستان کے ساتھ ہمارے اور بھی پچاس معاملات ہیں جن کودیکھنا ہوتاہے۔
