کراچی (نیوز ڈیسک) کراچی کے علاقے بن قاسم میں ایک ہی خاندان کے پانچ افراد کی لاشیں ملنے کے واقعے میں پولیس سرجن ڈاکٹر سمیعہ کا اہم بیان سامنے آگیا ہے۔ ان کے مطابق ابتدائی طبی معائنے میں دو افراد کی موت سر پر گولیاں لگنے کے باعث ہونے کی تصدیق ہوئی ہے، جبکہ دیگر تین افراد کی ہلاکت کی وجوہات کا تعین متعلقہ رپورٹس آنے کے بعد کیا جائے گا۔
تفصیلات کے مطابق پولیس سرجن ڈاکٹر سمیعہ نے بتایا کہ جاں بحق ہونے والے شاہزیب اور ان کی اہلیہ صبا کے سروں پر ایک، ایک گولی لگنے کے نشانات پائے گئے۔ شاہزیب کی عمر تقریباً 35 سال، جبکہ صبا کی عمر 28 سے 30 سال کے درمیان بتائی گئی ہے۔
ڈاکٹر سمیعہ کے مطابق دونوں افراد کے گن شاٹ ریزیڈیو، کیمیائی تجزیے اور ڈی این اے کے نمونے حاصل کرلیے گئے ہیں، جن کی جانچ کے نتائج تحقیقات میں اہمیت رکھتے ہیں۔
تین افراد کی موت کی وجہ تاحال سامنے نہیں آئی
پولیس سرجن نے بتایا کہ اسی واقعے میں جاں بحق ہونے والی شمائلہ، ایزل اور آریا کی موت کی وجوہات متعلقہ طبی اور فرانزک رپورٹس موصول ہونے تک محفوظ رکھی گئی ہیں۔
ان کے مطابق شمائلہ کی عمر 20 سے 22 سال، ایزل کی تقریباً پانچ سال اور آریا کی عمر لگ بھگ تین سال تھی۔ تینوں کے کیمیائی تجزیے، سیرولوجی اور ڈی این اے کے نمونے بھی حاصل کرلیے گئے ہیں۔
حکام کے مطابق تاحال یہ حتمی طور پر واضح نہیں ہوسکا کہ پانچوں افراد کی اموات قتل، خودکشی یا کسی دوسرے واقعے کا نتیجہ تھیں۔ معاملے کی مختلف پہلوؤں سے تحقیقات جاری ہیں، جبکہ فراہم کردہ اطلاعات کے مطابق مقدمہ بھی ابھی درج نہیں کیا گیا۔
نماز جنازہ آج عصر کے بعد ادا کرنے کا اعلان
متوفی خاندان کے پانچوں افراد کی نماز جنازہ آج نماز عصر کے بعد ادا کیے جانے کا بتایا گیا ہے۔ تاہم واقعے کے اصل محرکات اور ہلاکتوں کی حتمی وجوہات کا تعین تحقیقاتی کارروائی اور فرانزک رپورٹس سامنے آنے کے بعد ہی ممکن ہوگا۔
یاد رہے کہ گزشتہ روز کراچی کے علاقے بن قاسم کی فلک ناز سوسائٹی میں ایک گھر سے میاں بیوی، ان کی دو کمسن بیٹیوں اور شوہر کی بہن کی لاشیں ملی تھیں۔
ابتدائی اطلاعات کے مطابق گھر سے ملنے والی ایک تحریر میں شاہزیب نے مالی مشکلات اور رشتہ داروں کی جانب سے مبینہ طور پر مدد نہ ملنے کا ذکر کیا تھا۔ تاہم تحریر میں بیان کردہ دعوؤں اور ان کے واقعے سے تعلق کی آزادانہ تصدیق ہونا ابھی باقی ہے۔ پولیس کی تحقیقات مکمل ہونے کے بعد ہی اس افسوسناک واقعے کے بارے میں مزید حقائق سامنے آسکیں گے۔
