اسلام آباد(آئی این پی) سینیٹر اعظم خان سواتی 2دفع وفاقی وزیر سائنس اینڈ ٹیکنالوجی تعینات ہوئے مگر ایک بار بھی اپنی مدت مکمل نہ کر سکے اور دونوں بار استعفیٰ دیا۔تحریک انصاف کی حکومت میں اعظم خان سواتی بطور وفاقی وزیر 2ماہ اور ایک دن جبکہ پیپلز پارٹی کے دورہ حکومت میں اسی عہدے پر1سال10 ماہ اور16دن رہے۔تفصیلات کے مطابق آئی جی اسلام آباد تبدیلی کیس کی وجہ سے وفاقی وزیر سائنس اینڈ ٹیکنالوجی سینیٹر اعظم خان سواتی نے وزیر اعظم عمران خان کو استعفیٰ دیدیا ہے۔سینیٹر اعظم سواتی صرف 2ماہ اور ایک دن

وفاقی وزیر کے عہدے پر رہے۔سینیٹر اعظم خان سواتی نے 5اکتوبر2018کو بطور وفاقی وزیر سائنس اینڈ ٹیکنالوجی اپنے عہدے کا حلف اٹھایا تھا۔اس سے قبل پیپلز پارٹی کے دورہ حکومت میں بھی سینیٹر اعظم خان سواتی جمعیت علما ء اسلام (ف)کی طرف سے وفاقی وزیر سائنس اینڈ ٹیکنالوجی کے عہدے پر رہے،اس وقت اعظم خان سواتی نے28جنوری 2009کو اپنے عہدے کا حلف اٹھایا جبکہ14دسمبر2010کو استعفیٰ دیدیا،اس وقت بھی سینیٹر اعظم خان سواتی نے مبینہ طور پر اختیارات نہ ہونے اور اختلافات کی وجہ سے استعفیٰ دیا تھا۔

موضوعات:اعظم خان سواتی