لاہور(این این آئی) وزیراعلیٰ پنجاب سردار عثمان بزدار نے وزیراعلیٰ آفس میں وزیراعلیٰ شکایت سینٹرکے افتتاح کے موقع پر میڈیا کے سوالوں کے مدلل انداز میں جوابات دیئے۔ وزیراعلیٰ نے میڈیا کے ایک سوال کے جواب میں بتایا کہ مجھ سے زیادہ جنوبی پنجاب اور غریبوں کا درد کسے ہوگا۔ میرا علاقہ پسماندہ ترین علاقہ ہے۔ 25 جولائی کو الیکشن لڑا اور 27 جولائی کو بھی زمین پر سویا تھا۔ میرے علاقے میں جہاں بچے پڑھتے ہیں، آپ اس جگہ کا تصور بھی نہیں کرسکتے۔ میرے گاؤں میں بجلی پہنچ گئی ہے لیکن اس کے بعد بجلی مزید علاقوں میں بھی جائے گی۔

وزیراعلیٰ نے کہا کہ جلد میڈیا کو بھی اس جگہ کا دورہ کرایا جائے گا۔ قبل ازیں وزیراعلیٰ نے بٹن دبا کر وزیراعلیٰ شکایت سینٹر کا افتتاح کیا اورہیلپ لائن پر شہری کی شکایت بھی سنی۔ شہری نے شکایت درج کراتے ہوئے کہا کہ ٹاؤن شپ کے ایک سکول کے ریاضی کے ٹیچر کچھ عرصے سے غیر حاضر ہیں جس سے بچوں کی تعلیم متاثر ہو رہی ہے۔ شہری سے اس کا فون نمبر لیا گیا اور اسے شکایت نمبر 47-302/832 دیا گیا اور بتایا گیا کہ آپ کے موبائل فون پر میسج بھی آئے گا اور آپ کو شکایت کے ازالے کے بارے میں جلد آگاہ کیا جائے گا۔