لاہور(آن لائن) پنجاب کے 36 اضلاع کی عدالتوں کے حکم نامے ( آج) پیر کو ویب سائٹ پر جاری ہوں گے ۔ چیف جسٹس لاہور ہائی کورٹ جسٹس محمد انوارالحق نے سائلین اور وکلاء کی بڑی مشکل آسان کر دی ۔عدلیہ کا کوئی جج کسی بھی مقدمہ کا فیصلہ تحریر کر کے سنانے کا پابند ہو گا ۔ فیصلہ سنانے کے پانچ منٹ بعد فیصلہ کاپی متعلقہ جج انٹرنیٹ پر جاری کر دے گا ۔ تفصیلات کے مطابق سائلین اور وکلاء کو ماتحت عدلیہ میں نقول کے حصول کے لئے شدید مشکلات کا سامنا کرنا پڑتا تھا اور سائلین کو کئی کئی چکر کے
ساتھ ساتھ عدالتی اہلکار کی جیب بھی گرم کرنا پڑتی تھی ۔چیف جسٹس لاہور ہائی کورٹ جسٹس محمد انوارالحق نے ان مشکلات کو مدنظر رکھتے ہوئے عہدہ سنبھالنے کے بعد اس مسئلہ کا حل نکالنے کا حکم دیا جس کے بعد متعدد تجاویز سامنے آئیں ۔ تاہم چیف جسٹس لاہور ہائی کورٹ جسٹس انوارالحق نے انتظامی سطح پر یہ حکم جاری کر دیا کہ ماتحت عدلیہ کا کوئی بھی جج فیصلہ تحریر کئے بغیر نہیں سنائے گا اور فیصلہ سنانے کے بعد معزز جج اس فیصلہ کو پانچ منٹ میں انٹرنیٹ پر اپ لوڈ کرنے کا پابند ہو گا ۔
