کراچی(نیوز ڈیسک ) چیف جسٹس آف پاکستان جسٹس ثاقب نثار نے کہا ہے کہ ڈیمز پر خود پہرہ دوں گا، میرا کوئی سیاسی ایجنڈا ہے نہ کبھی سیاست میں آنا ہے۔ جمعہ کو ڈیمز فنڈ کے حوالے سے اپنے پیغام میں چیف جسٹس میاں ثاقب نثار نے کہا ہے کہ میرا مقصد ڈیمز، تعلیم اور صحت کے لیے کام کرنا ہے، آبادی کے ساتھ پانی کی ضرورت بڑھ رہی ہے، پانی ذخیرہ کرنے کے لیے ہمیں ذخائر بنانا ہوں گے۔چیف جسٹس نے کہا کہ آبادی کے ساتھ پانی کی ضرورت بھی بڑھ رہی ہے، پانی پاکستان کی

بقا کے لیے ضروری ہے، ہمارے پاس تاخیر کا مزید وقت نہیں ہے، اب ڈو اور ڈائی والی صورتحال ہے۔جسٹس ثاقب نثار نے کہا کہ آسٹریلیا، جنوبی افریقہ کے ماڈلز موجود ہیں، ماہرین سے ان ماڈلز پر مشاورت کرچکے ہیں اصل معاملہ ان پر عمل درآمد کا ہے، پوری سچائی اور ایمانداری سے کام کرنے کی ضرورت ہے۔چیف جسٹس نے کہا کہ ڈیمز کو مکمل میرٹ پر بنائیں گے، اسکولوں کے بچے پاکٹ منی جمع کرکے ڈیمز میں جمع کرارہے ہیں، کیا کوئی باپ ان بچوں کے پیسوں میں خیانت کرسکتا ہے۔