کراچی(این این آئی)پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان تحریک انصاف تحریک انتقام بننے کی کوشش کر رہی ہے، نیب کی کارروائیاں سیاسی انتقام ہیں، اپوزیشن لیڈر شہبازشہریف کی ضمنی الیکشن سے قبل گرفتاری سے ظاہر ہو رہا ہے کہ معاملہ احتساب کا نہیں انتقام کا ہے۔ معاشی پالیسیوں کی وجہ سے عوام موجودہ حکومت کو پانچ سال برداشت نہیں کریں گے۔
بینظیر بھٹو سانحہ کارساز کے بعد جام شہادت نوش کرنے تک آمریت اور دہشتگردی کو چیلنج کرتی رہیں، پیپلز پارٹی اپنے ان شہدا کو ہمیشہ یاد رکھتی ہے، جنہوں نے آمریت اور دہشت گردوں کے خلاف جوانمردی سے لڑتے ہوئے جان دی۔بلاول بھٹوزرداری نے جمعرات کو کراچی میں سانحہ کارساز کی برسی کے موقع پر شارع فیصل پر قائم یادگار شہدا پر حاضری دی۔اس موقع پر وزیراعلیٰ سندھ سید مراد علی شاہ،سابق اپوزیشن لیڈرسیدخورشید شاہ،پیپلزپارٹی سندھ کے صدر نثار کھوڑو، صوبائی وزراء سیدناصر حسین ، سعید غنی، بیرسٹرمرتضی وہاب سمیت اور پیپلزپارٹی کارکنوں کی بڑی تعداد بھی موجود تھی۔ اس موقع پر میڈیا سے بات چیت کرتے ہوئے بلاول بھٹو زرداری نے کہا کہ سانحہ کارساز تاریخ کا سب سے بڑا دہشت گردی کا واقعہ تھا، شہدا کی قربانیوں کو سلام پیش کرتا ہوں۔ دہشت گردی کے واقعات میں ہمارے شہیدوں کو بھی انصاف نہیں ملا، کرائم سین کو دھوکر شواہد مٹادیئے گئے۔انہوں نے کہاکہ پیپلز پارٹی نے جمہوریت، امن اور اس ملک کے لیے قربانیاں دی ہیں، پیپلز پارٹی کی جدوجہد جاری رہے گی ، دہشت گردی کے خطرات سے نہیں ڈریں گے، گزشتہ عام انتخابات میں بھی دہشت گردی کے کئی واقعات ہوئے، دہشت گردی کے واقعات کی تحقیقات کرکے عوام کو آگاہ کیا جانا چاہیے۔بلاول بھٹو زرداری نے کہا کہ حکومت اپنے فیصلوں سے عام آدمی کو تکلیف پہنچارہی ہے۔پاکستان تحریک انصاف کی حکومت نے معیشت کو سب سے زیادہ نقصان پہنچایاہے ۔
وزیراعظم جس طریقے سے معیشت کو چلا رہے ہیں، عوام انہیں پانچ سال پورے نہیں کرنے دیں گے۔عوام کو مہنگائی کے بوجھ تلے دبا دیا گیا ہے۔ایک سوال پر کہ ابھی تک بے نظیر بھٹو کے قاتلوں کا گرفتار نہیں کیا جاسکا، بلاول بھٹونے کہاکہ کرائم سین کو دھودیا گیا اور مزید ثبوت ختم کردیئے گئے، لیکن اس کے باوجود قاتلوں کا پکڑنا ناممکن نہیں۔نیب کی کارروائیوں پر بلاول بھٹوزرداری نے کہاکہ اس کے پیچھے تحریک انصاف ہے، جو اب تحریک انتقام بن چکی ہے پیپلز پارٹی اور ن لیگ کو سیاسی انتقام کا نشانہ بنایا جا رہا ہے۔اپوزیشن لیڈر شہباز کی ضمنی الیکشن سے قبل گرفتاری سے ظاہر ہو رہا ہے کہ معاملہ احتساب کا نہیں انتقام کا ہے۔بلاول بھٹو زرداری کی شارع فیصل کارساز آمد پر سیکیورٹی کے سخت انتظامات کیے گئے تھے پولیس کی بھاری نفری تعینات کی گئی تھی
