سکھر(آن لائن) جے یو آئی سندھ کے سیکرٹری جنرل علامہ راشد محمود سومرو نے کہا ہے کہ کالاباغ ڈیم کی تعمیر غیر قانونی غیر آئینی اور غیر شرعی ہے، سندھ سمیت تین اسمبلیاں رد کر چکی ہیں، سیاسی لوگ جیل تھانوں سے گھبرایا نہیں کرتے، کالا باغ ڈیم بنایا گیا تو سندھ کی عوام مزاحمت کیلئے تیار ہے ۔تفصیلات کے مطابق جے یو آئی سندھ کے سیکرٹری جنرل علامہ راشد محمود سومرو نے کہا ہے کہ کسی بھی صورت سندھ دشمن منصوبہ کالاباغ ڈیم بننے نہیں دیں گے،
آرٹیکل 6 کو جوتی کے نوک پر رکھتے ہیں پانی کے معاملے پر کسی قسم کی غنڈہ گردی اور دہشت گردی برداشت نہیں کی جائے گی سندھ اور سندھی قوم کسی بھی صورت کالاباغ ڈیم کی تعمیر قبول نہیں کریں گے جاری کردہ بیان میں مولانا راشد محمود سومرو نے مزید کہا ہے کہ سندھ سمیت تین صوبائی اسمبلیاں کے پی کے اور بلوچستان کالاباغ ڈیم کو رد کر چکی ہیں، مردہ گھوڑے کو دوبارہ زندہ کرنے کی ناکام کوشش کی جا رہی ہے، پہلے بھاشا ڈیم اور دیا میر کی بات کی گئی اب کالاباغ ڈیم کا نام لیکر دہمکیان دی جا رہی ہیں جیل تھانوں سے ہمیں ڈرایا نہیں جا سکتا، کالاباغ ڈیم ہماری لاشوں پر بن سکتا ہے شہید اسلام ڈاکٹر خالد محمود سومرو نے مسجد کے ممبر پر کالاباغ ڈیم کی مخالفت کی تھی سندھو دریائے سندھ پر پہلا حق سندھ کا ہے، علماء کرام کی متفق فتویٰ موجود ہے پانی سندھ اور سندھیوں کے مستقبل کا سوال ہے، ہم آنے والی نسلوں کو پیاسا مارنا نہیں چاہتے کالاباغ ڈیم زبردستی بنانے کی کوشش کی گئی تو سندھ کے لوگ مزاحمت کیلئے تیار ہیں جسم میں آخری سانس تک سندھ دشمن منصوبوں کے خلاف جنگ کرتے رہیں گے ہم سیاسی لوگ ہیں، سیاسی لوگ کبھی بھی جیل تھانوں سے گھبرا کر جدوجہد سے دستبردار نہیں ہوتے، اگر کوئی سمجھتا ہے کہ سندھ کے 7 کروڑ عوام کو دھمکیاں دیکر ڈیم بنائیں گے یہ ان کی بھول ہے، جے یو آئی نے کالاباغ ڈیم کے خلاف بھرپور احتجاج کرکے مخالفت کی ہے، آرٹیکل 6 کو جوتے کے نوک پر رکھتے ہیں۔
