اسلام آباد (نیوز ڈیسک) وفاقی وزیر خزانہ اسد عمر نے سابق گورنر سندھ اور اپنے بھائی زبیر عمر کو پنشن دینے کیلئے قوانین میں نرمی سے انکار کر دیا ہے۔ ایک موقر قومی اخبار کی رپورٹ کے مطابق ذرائع کا کہنا ہے کہ یہ سمری نگران حکومت کے دور میں کیبنٹ ڈویژن کی جانب سے دی گئی تھی۔ سابق گورنرز کو ان کی تنخواہ کی 80 فیصد رقم ماہانہ پنشن کے طور پر دی جاتی ہے تاہم پنشن کے حصول کیلئے کم از کم دو سال سے گورنر کے

عہدے پر رہنا ضروری ہوتا ہے۔ پاکستان مسلم لیگ (ن) کی حکومت نے محمد زبیر کو فروری 2017ء میں گورنر مقرر کیا تھا لیکن پچیس جولائی کو عام انتخابات میں تحریک انصاف کی کامیابی کی وجہ سے انہوں نے استعفیٰ دے دیا تھا۔ اس طرح محمد زبیر ڈیڑھ سال کے لیے گورنر سندھ رہے اور پنشن کے حصول کے لیے مقرر کم از کم 2 سال کی مدت پوری نہ کر سکے۔ اسد عمر نے کہا کہ مفادات کے ٹکراؤ کی وجہ سے سمری مسترد کی۔