لاہور (نیوز ڈیسک) لندن سے بیگم کلثوم نواز کے انتقال کی خبر آئی تو حکومت نے سابق وزیراعظم میاں نواز شریف ، مریم نواز اور کیپٹن (ر) صفدر کو پیرول پر تین دن کی رہائی دیتے ہوئے جاتی امراء جانے کی اجازت دے دی، جہاں پر تعزیت کرنے والے افراد کا رش لگا ہوا ہے، شریف خاندان کلثوم نواز کی وفات کی وجہ سے غم سے نڈھال ہے، یہ خبر جب اڈیالہ جیل میں ان تک پہنچی تو وہ لوگ غم کی شدت سے آنسوؤں پر قابو نہ رکھ سکے، خصوصاً مریم نواز تو اپنی والدہ کی وفات پر غم سے نڈھال ہو گئیں۔
اس موقع پر سینئر صحافی کامران خان نے پیرول پر رہائی کے بعد میاں نواز شریف کی ایسی تصویر شیئر کی جسے دیکھ کر ہر کوئی اشکبار ہو گیا، یہ تصویر شیئر کرتے ہوئے معروف صحافی نے اپنے ٹوئٹر پیغام میں لکھا کہ ’’جناب نواز شریف کی کل رات گئے لی گئی یہ تصویر اپنے اندر اک کرب ناک داستان چھپائے ہوئے ہے، یہ تصویر سبق بھی ہے اور سیاسی تاریخ کا کریہہ باب بھی، نہ جانے کیا ہوا ایک سال میں شریف خاندان کی کایہ ہی الٹ گئی، نواز شریف کی یہ تصویر خود اس سوال کا جواب ہے۔‘‘
