اٹک ( آئی این پی ) وزیر اعظم کے مشیر برائے موسمیاتی تبدیلی اور حلقہ این اے 56 سے تحریک انصاف کے امیدوار ملک امین اسلم نے کہا ہے کہ تحریک انصاف میں صرف وزیر اعظم عمران خان کا نظریہ چلے گا کسی کی منافقت نہیں چلے گی منافقت کرنے والوں کی پارٹی میں جگہ نہیں ہے ۔
کسی ایک شخص کے آنے جانے سے تحریک انصاف کو کوئی فرق نہیں پڑے گا ، انہوں نے یہ بات تحریک انصاف کے مقامی عہدے داروں کے ایک اجلاس سے خطاب کرتے ہوئے کہی جس سے تحریک انصاف ضلع اٹک کے صدر قاضی احمد نے بھی خطاب کیا اور انہوں نے کہا کہ میرے بارے میں بعض لوگوں نے غلط تاثر دیا ہے ہم ہر اس شخص کا ساتھ دینگے جس کو وزیر اعظم عمران خان نامزد کریں گے ، این اے 56 کے لئے عمران خان نے ملک امین اسلم کو امیدوار بنایا ہے اور ہم سب عہدیدار امین اسلم کو کامیاب کرائینگے ۔ ملک امین اسلم نے کہا کہ وہ عمران خان کے وژن کے ساتھ ہیں ۔ اب تحریک انصاف میں منافقت نہیں چلے گی اور یہاں پر کچھ لوگ منافقت کر رہے ہیں ۔ پارٹی میں وہی رہے گا جو عمران خان کے ساتھ چلے گا ۔ ایسے لوگوں کی پارٹی میں کوئی گنجائش نہیں ہے جو عمران خان سے وعدہ خلافی کر رہے ہیں ۔ کسی ایک شخص کے آنے جانے سے پارٹی کوفرق نہیں پڑے گا ۔ الیکشن میں کامیابی کے بعد بجلی ، گیس اور تھانہ کچہری کے مسائل حل کیے جائینگے ۔ واضح رہے کہ وزیر اعظم عمران خان نے تحریک انصاف کے اٹک کے اہم رہنماء میجر (ر) طاہر صادق کے خاندان میں سے کسی کو ٹکٹ دینے سے انکار کر دیا ہے اور امین اسلم کو جب سے پارٹی امیدوار نامزد کیا ہے تحریک انصاف اٹک کے درمیان اختلافات پائے جائے رہے ہیں اور میجر(ر) طاہر صادق نے ملک امین اسلم کی حمایت کرنے سے انکار کردیا ہے ۔
