اسلام آباد(آئی این پی) تحریک انصاف کے ترجمان اور نامزد وفاقی وزیر اطلاعات نشریات فواد چوہدری نے سابق وفاقی وزیر اور مسلم لیگ (ن)کے سینئر رہنما احسن اقبال کو” جعلی ارسطو “قرار دیتے ہوئے کہا ہے کہ احسن اقبال جس کابینہ کا حصہ تھے اسکی آدھی تعداد بھی مشرف صاحب کی ہی کابینہ تھی، اس وقت احسن اقبال کی آنکھوں پر منافقت کی پٹی تھی۔اتوار کو سابق وزیر داخلہ اور اور مسلم لیگ (ن)کے سینئر رہنما احسن اقبال نے سوشل میڈیا کی ویب سائٹ ٹوئٹر پر وزیراعظم عمران خان کی
جانب سے نامزد کردہ وفاقی کابینہ پر تنقید کرتے ہوئے ٹوئٹ کی کہ کابینہ دیکھ کے معلوم ہوا کہ نئے پاکستان کے دھوکے میں ہم مشرف کے قدیم پاکستان میں پہنچ گئے ہیں ۔جس کے جواب میں نامزد وفاقی وزیر اطلاعات نشریات فواد چوہدری نے احسن اقبال کی ٹوئٹ کو ری ٹوئٹ کرتے ہوئے لکھا کہ آپ جس کابینہ کا حصہ تھے اس کی آدھی تعداد بھی مشرف صاحب کی ہی کابینہ تھی لیکن اس وقت آپ کی آنکھوں پر منافقت کی پٹی اور اقتدارکا ہوس تھا تو آپ کواعتراض نہیں تھا ،جعلی ارسطو صاحب۔
