خوشاب(آئی این پی)خوشاب کے علاقے جوہر آباد میں مسلم لیگ (ن) کے سابق ایم این اے ملک شاکر بشیر کے خلاف خاتون کے ساتھ زیادتی کا مقدمہ درج کر لیا گیا۔ تفصیلات کے مطابق جمعہ کو مسلم لیگ (ن) کے سابق ایم این اے ملک شاکر بشیر کے خلاف خاتون سے زیادتی کا مقدمہ درج کر لیا گیا۔ مقدمہ سکول ٹیچر کی مدعیت میں سٹی تھانہ جوہر آباد میں درج کیا گیا۔ ایف آئی آر میں سکول ٹیچر عالیہ شہزادی نے مؤقف اپنایا کہ شاکر بشیر
نے تین روز قبل نوکری کیلئے بلا کر زیادتی کا نشانہ بنایا۔پولیس نے خاتون کی مدعیت میں رپورٹ نمبر49اور دفعہ 376کے تحت مقدمہ درج کر لیا۔ مدعیہ نے یہ بھی کہا کہ اسے ملزمان نے جان سے مارنے کی دھمکی بھی دی ہے اس لیے اسے انصاف کے ساتھ ساتھ تحفظ فراہم کیا جائے۔پولیس کے مطابق خاتون کا طبی معائنہ اور ڈی این اے کروایا جائے گا ، میڈیکل رپورٹ آنے کے بعد نامزد ملزم کے خلاف قانونی کارروائی کی جائے گی۔
