کراچی (این این آئی)قوم کی بیٹی ڈاکٹر عافیہکی ہمشیرہ اور عافیہ موومنٹ کی رہنما ڈاکٹر فوزیہ صدیقی نے عام انتخابات 2018 ء میں پاکستان تحریک انصاف کی کامیابی پر عمران خان کو مبارکباد دیتے ہوئے ان کی حکومت کی کامیابی کیلئے نیک خواہشات کا اظہار کیاہے۔ وہ گذشتہ روز ’’عالمی طبی کانفرنس‘‘ میں شرکت کیلئے بنکاک روانگی کے موقع پر عافیہ موومنٹ کے سپورٹرز سے ملاقات میں گفتگو کررہی تھیں۔

ڈاکٹر فوزیہ نے کہا کہ عافیہ کی فیملی خواہشمند تھی کہ عام انتخابات کے نتیجے میں ملک میں عوام سے مخلص ایک غیرتمند، ایماندار، مستحکم اور آئین کی پاسداری کرنے والی حکومت اوراسمبلیوں میں عوام، ملک اور جمہوریت کیلئے مثبت کردار ادا کرنے والی اپوزیشن قائم ہو جو اداروں کو مضبوط بنانے پر خصوصی توجہ دیں کیونکہ 2003 ء میں کمزور اداروں کی وجہ سے ہی سرکاری حکام نے معصوم عافیہ اور اس کے تین کمسن بچوںکو اٹھا کر امریکیوںکے حوالے کردیا تھا جو پہلے عافیہ اور اس کے بچوں کو غیرقانونی طور پر سرحد پار افغانستان اور بعد ازاں امریکہ لے گئے تھے ۔انہوں نے کہا کہ عافیہ جس امریکی( کارس ویل) جیل میں قید ہے وہاں قیدیوں کو ہرماہ اپنے اہلخانہ سے وڈیو کانفرنس کی سہولت مہیا کی جاتی ہے مگر2 سال سے زائد عرصہ گذرگیا ہے ہمارا عافیہ سے ٹیلی فون پر ہونے والا رابطہ بھی منقطع کردیا گیا ہے۔ ڈاکٹر فوزیہ نے مزید کہا کہ جب 5سال کی جبری گمشدگی کے بعدبرطانوی صحافی مریم ایوان ریڈلے کی کاوشوں سے عافیہ کی بگرام افغانستان کے امریکی عقوبت خانے میں موجودگی کی خبر منظر عام پر آئی تھی تو ملک میں آمریت کے باوجود عمران خان نے عافیہ کی بے گناہی اور وطن واپسی کے معاملہ پر انتہائی جراتمندانہ موقف اپنایا تھا ۔ انہوں نے امید ظاہر کی کہ عمران خان سابقہ حکمرانوں سے مختلف ثابت ہوں گے اور اپنے انتخابی منشور میں موجود قوم کی بیٹی ڈاکٹر عافیہ کو واپس لانے کا وعدہ نہیں توڑیں گے۔ عافیہ کی فیملی دعا گو ہے کہ عمران خان کا نظام کی تبدیلی کا خواب پورا ہو اور پاکستان کے عوام کو ایسا نیا اور خوشحال پاکستان نصیب ہوجس میں قوم کی ہر بیٹی محفوظ ہو۔