راولپنڈی(مانیٹرنگ ڈیسک)نواز شریف، مریم نواز اور محمد صفدر کو اڈیالہ جیل کے اندر ایک ہی کمپاؤنڈ میں رکھا گیا ہے مگر تینوں کے کمرے الگ الگ ہیں تاہم وہ ایک دوسرے سے ملاقات کرسکتے ہیں۔میڈیا رپورٹس کے مطابق نواز شریف، مریم نواز اور محمد صفدر اس وقت اڈیالہ جیل میں قید ہیں جہاں تینوں کو اڈیالہ جیل کے اندر ایک ہی کمپاؤنڈ میں رکھا گیا ہے۔ تینوں کے کمرے الگ الگ ہیں لیکن وہ ایک دوسرے سے ملاقات کرسکتے ہیں ۔
دوسری جانب ن لیگی ذرائع نے بتایا کہ مریم نواز نے والد کو جیل بھیجنے اور خود سہالہ پولیس ٹریننگ کالج ریسٹ میں پہنچائے جانے کی سختی سے مخالفت کی اور سرکاری حکام پر واضح کیا وہ اپنے والد کو اکیلے جیل میں چھوڑ کر خود سہالہ پولیس ٹریننگ کالج ریسٹ ہاوس نہیں جا سکتیں ۔ذرائع کے مطابق سرکاری حکام نے آگاہ کیا کہ مریم نواز کو بینظیر بھٹو شہید اور ان کی والدہ نصرت بھٹو کی طرح سہالہ ریسٹ ہاس میں قید رکھا جائے گا اور نواز شریف کو اڈیالہ جیل میں رکھا جائے گا اس پر ن لیگ کے رہنما کے مطابق مریم نواز نے دو ٹوک الفاظ میں کہا کہ وہ اپنے والد میاں محمد نواز شریف سے جدا ہو کر ریسٹ ہاؤس میں کسی قیمت پر جانے کو تیار نہیں ہیں۔دریں اثناء ایون فیلڈ ریفرنس میں مجرم سابق وزیراعظم نواز شریف اور مریم نواز نے رات اڈیالہ جیل میں گزاری، صبح سویرے دونوں باپ بیٹی کوچائے پراٹھے اور انڈے کا ناشتہ پیش کیا گیا لیکن نوازشریف اور مریم نے صرف چائے پر ہی اکتفاکیا ادھر جمعہ کی رات گرفتاری کے بعد نواز شریف اور مریم نواز کو جج احتساب عدالت کے روبرو پیش کیا گیا تھا جہاں جج محمد بشیر نے مجرموں کو جیل منتقل کرنے کے احکامات جاری کیے، جیل منتقلی کے بعد ڈاکٹروں کی خصوصی ٹیم بھجی گئی، جس نے نواز شریف اور مریم نواز کا میڈیکل چیک اپ کیا جس کے بعد نوازشریف اور مریم نواز کو اڈیالہ جیل میں رات گزارنا پڑی۔
