لاہور (نیوز ڈیسک) تحریک انصاف میں ٹکٹوں کی غیر منصفانہ تقسیم کے خلاف احتجاج کرنے والی خواتین نے مخصوص نشستوں کی فہرست مرتب کرنے والی مبینہ مرکزی کردار عالیہ حمزہ کا گھیراؤ کر لیا تاہم سٹاف نے بڑی مشکل سے عالیہ حمزہ کو کمرے سے بچا کر نکالا۔تفصیلات کے مطابق تحریک انصاف کی رہنما صائمہ شوکت ،ارم بخاری ،فاطمہ عثمان سمیت دیگر خواتین چیئرمین سیکرٹریٹ گارڈن ٹاؤن پہنچیں اور زبردستی کمرے میں داخل ہو گئیں جہاں عالیہ حمزہ موجود تھیں ۔ خواتین نے عالیہ حمزہ کا گھیراؤ
کیا اور ان پر شدید تنقید شروع کر دی جس پر عالیہ حمزہ نے اپنے سٹاف کو طلب کیا تو انہوں نے بڑی مشکل سے عالیہ حمزہ کو باہر نکالا ۔ احتجاج کرنے والی خواتین نے الزام عائد کیا کہ عالیہ حمزہ اور منزہ حسین نے دیرینہ رہنماؤں کو نظر انداز کر کے اپنی من پسند خواتین کو فہرست میں شامل کیا ، یہ کون ہوتی ہیں ہمارے فیصلے کرنے والی ، خواتین کی مخصوص نشستوں کی فہرست کا ازسر نو جائزہ لے کر نشستیں میرٹ پر الاٹ کی جائیں،جب تک ہمارے مطالبات پورے نہیں ہوتے اپنا احتجاج جاری رکھیں گی ۔
