کراچی (این این آئی) بینک الفلاح لمیٹڈ نے 14مئی 2018کو دبئی میں منعقدہ تقریب میں افغانستان میں اپنے آپریشنز کی منتقلی کے لیے افغانستان کے صف اول کے بینکاری ادارے عزیزی بینک کے ساتھ ایک معاہدہ کرلیا ہے ۔ بینک الفلاح کے افغانستان آپریشنز کے اثاثہ جات کی مجموعی مالیت 31مارچ 2018تک 15.3ارب افغانی تھی۔ اس منتقلی سے بینک الفلاح افغانستان کے ملازمین اور ریٹیل شاخیں بھی عزیزی بینک کا حصہ بن جائیں گی۔
عزیزی بینک کا اس خطے میں خدمات کا تجربہ بینک الفلاح کے صارفین کو ان کی توقعات کے مطابق معیاری خدمات کی فراہمی جاری رکھنے میں کلیدی کردار ادا کرے گا اور ساتھ ہی بینک الفلاح کو اپنی سب سے بڑی جغرافیائی مارکیٹ پاکستان میں زیادہ سرمایہ کاری اور ترقی کے مواقع فراہم کرے گا۔ یہ معاہدہ دونوں ممالک میں ضروری ریگولیٹری منظوری کے بعد نافذ العمل ہوگا۔معاہدے پر بینک الفلاح کے سی ای او نعمان انصاری اور عزیزی بینک کے سی ای او محمد سالم عمید نے دستخط کیے۔ اس موقع پر دونوں اداروں کے اعلیٰ انتظامی عہدیدار بھی موجود تھے۔تقریب سے خطاب کرتے ہوئے بینک الفلاح کے سی ای او نعمان انصاری نے کہا کہ ’’میں بینک الفلاح کے افغانستان میں آپریشنز کو افغانستان کے صف اول کے بینکاری ادارے، عزیزی بینک کو منتقلی کے معاہدے کا اعلان کرتے ہوئے نہایت خوشی محسوس کررہا ہوں۔ یہ معاہد ہ تمام خطوں میں جہاں بینک الفلاح خدمات فراہم کررہا ہے صارفین کو اعلیٰ معیاری خدمات کے ذریعے انھیں بہترین تجربے کی فراہمی کی ہماری ترجیحات کی عکاسی کرتا ہے۔ ہمارا ماننا ہے کہ مقامی تجربہ صارفین کو معیاری خدمات کی فراہمی کے لیے ضروری معیار کے حصول میں کلیدی کردار ادا کرتا ہے۔ ہم پر اعتماد ہیں کہ عزیزی بینک کے تجربہ اور مقامی مارکیٹ سے متعلق علم سے ہمارے صارفین کو عزیزی کے ساتھ ہمارے باہمی بینکاری تعلق سے بہترین فوائد حاصل ہوسکیں گے ۔‘‘
عزیزی بینک کے سی ای او محمد سالم عمیدنے اپنے خطاب میں کہا: ’’ہم آج بے حد فخر محسوس کررہے ہیں۔ آپریشنز کی منتقلی سے ہم افغانستان کے سب سے بڑے بینک بننے کی جانب اپنے سفر میں اہم پیش رفت کرسکیں گے۔ صارفین کو اولیت دینے اور انھیں بہترین خدمات کی فراہمی کی بینک الفلاح کی شہرت اور عزیزی بینک کا ملک میں وسیع نیٹ ورک کے ذریعے متعدد خدمات کی فراہمی کا تجربہ ہمیں اپنے صارفین کو بہترین بینکاری خدمات کی فراہمی میں مدد دے گا۔‘‘تقریب میں مالیاتی مشیران گرانٹ تھرونٹن اور قانونی مشیران آر آئی اے اے بارکر جلیٹ بھی موجود تھے۔
