لاہور (ا ین این آئی) چیف الیکشن کمشنر آف پاکستان سردار محمد رضا نے واضح کیا ہے کہ 2018ء کے انتخابات پاکستان کے مستقبل کے لئے بہت اہم ہیں اور ہم آئین اور قانون کے مطابق شفاف الیکشن کروائیں گے،انتخابات میں کسی کی مداخلت برداشت نہیں کی جائے گی، الیکشن کے تمام عملے کو سکیورٹی فراہم کی جائیگی۔ان خیالات کا اظہار انہوں نے گزشتہ روز لاہور میں تقریب سے
خطاب کرتے ہوئے کیا ۔چیف الیکشن کمشنر سردار محمد رضا نے کہا کہ الیکشن ایکٹ 2017ء شفاف الیکشن کے لئے بڑا اقدام ہے،شفاف انتخابات کروانا الیکشن کمیشن کی ذمہ داری ہے، شفاف عام انتخابات کروانے کے لیے الیکشن کمیشن بھرپور کام کر رہا ہے، 2018ء کے انتخابات پاکستان کے مستقبل کے لیے بہت اہم ہیں اور ہم آئین اور قانون کے مطابق شفاف الیکشن کروائیں گے۔ انتخاب میں کسی کی مداخلت برداشت نہیں کی جائے گی، الیکشن کے تمام عملے کو سکیورٹی فراہم کی جائیگی۔انہوں نے کہا کہ عام انتخابات کو شفاف بنانے میں ڈسٹرکٹ ریٹرننگ افسران کا بڑا کردار ہے عدلیہ ایک شفاف ادارہ ہے، یہی وجہ ہے کہ عام انتخابات کے عدلیہ سے ڈسٹرکٹ ریٹرننگ افسران کی خدمات حاصل کرنا شفاف الیکشن کے لیے بڑا اقدام ہے۔ پنجاب پاکستان کا سب سے بڑا صوبہ ہے، اس کے نتائج آئندہ حکومت بنانے میں اہم کردارادا کریں گے۔اس موقع پر سیکرٹری الیکشن کمشنر بابریعقوب نے خطاب کرتے ہوئے کہا کہ الیکشن میں کوئی تاخیر نہیں ہوگی اور نہ ہی الیکشن کے درمیان کوئی خلائی مخلوق ہوگی۔واضح رہے کہ شفاف الیکشن کے حوالے سے اس سے قبل مختلف اوقات میں مختلف سیاسی جماعتیں اپنے اپنے خدشات کا اظہار کر چکی ہیں جبکہ 2013کے انتخابات میں تقریباََ سبھی جماعتوں نے ایک دوسرے پر دھاندلی کے الزامات عائد کئے تھے جبکہ پاکستان کی بڑی سیاسی جماعت تحریک انصاف نے اسی بنیاد پر حکومت کے خلاف طویل ترین دھرنا دیا تھا۔
