اسلام آباد(آن لائن)سپریم کورٹ میں آج پیرسے شروع ہونے والی عدالتی ہفتے کے دوران اہم مقدمات زیر سماعت آئیں گے جن میں اقامہ پر نااہلی کیخلاف خواجہ آصف کی اپیل پر سماعت پیر کو جسٹس عمرعطاء بندیال کی سربراہی میں تین رکنی بنچ سماعت کرے گا۔وزیرمملکت داخلہ طلال چوہدری کیخلاف توہین عدالت کیس،سیاستدانوں میں کروڑوں روپے کی تقسیم سے متعلق فیصلہ پر نظرثانی درخواستوں،ایگزیکٹ جعلی ڈگری از خود نوٹس ۔

مقامی حکومتی اداروں کی خودمختاری کیلئے ایم کیو ایم کی درخواست،میڈیا ورکرز کو تنخواہوں کی عدم ادائیگی پر از خود نوٹس کی سماعت آج (پیر) کو ہوگی۔کل (منگل) وزیراعلیٰ پنجاب شہبازشریف کیخلاف توہین عدالت درخواست،اسحاق ڈار کے کاغذات نامزدگی سے متعلق کیس،پی آئی اے سمیت ملکی اثاثوں کی کوڑیوں کے بھاؤ فروخت پر از خود نوٹس،کٹاس راج مندر تالاب خشک ہونے سے متعلق از خود نوٹس کیس کی سماعت ہوگی۔بدھ کو ڈاکٹر توقیر شاہ کی بطور سفیر ڈبلیو ٹی او تعیناتی پر از خود نوٹس،بلوچستان میں پانی کی قلت پر از خود نوٹس،مارگلہ پہاڑوں پر درختوں کی کٹائی سے متعلق از خود نوٹس اور میئر کراچی وسیم اختر کو کام سے روکنے کی درخواست پر سماعت ہوگی۔انتخابی فہرستوں سے متعلق عمران خان اور ایم کیو ایم کی درخواستوں پر سماعت جمعرات کو ہوگی۔جمعرات کے دیگر مقدمات میں سی ڈی اے کی جانب سے 4ہزار پلاٹوں کی غیر قانونی الاٹمنٹ پر از خود نوٹس،این جی اوز کی نگرانی کے طریقہ کار سے متعلق از خود نوٹس،بچوں کے اغواء و فروخت کیخلاف آئینی درخواست،پاکستان ریلوے میں بے ضابطگیوں اور تنخواہوں کی عدم ادائیگی پر از خود نوٹس،بھٹہ مزدوروں کے حقوق سے متعلق آئینی درخواست،بلوچستان سے20لاشیں ملنے پر از خود نوٹس شامل ہیں۔