لاہور(پ ر)وزیر اعلیٰ پنجا ب شہباز شریف نے کہا ہے کہ وال سٹریٹ جنرل اخبار میں گیلپ سروے کی خبر مسلم لیگ ن کی مقبولیت کا ثبوت ہے ۔ٹوئٹر پر پیغام دیتے ہوئے شہباز شریف نے کہا کہ تمام مصنوعی اور انجینئرڈ ناکامیاں پیدا کرنے کے باوجود مخالف سیاسی جماعتوں سے مسلم لیگ ن کی زیادہ مقبولیت کا ایک ثبوت وال سٹریٹ جنرل میں شائع ہونے والا گیلپ سروے بھی ہے ۔وزیر اعلیٰ پنجاب نے مزید کہا کہ اس سے یہ سبق ملتا ہے کہ پاکستان کا سیاسی منظر نامہ تبدیل ہو گیا
ہے اور اب لوگ جانتے ہیں کہ کس نے ان کی خدمت کی اور کس نے ان کا وقت ضائع کیا ۔واضح رہے کہ وال سٹریٹ جنرل میں گیلپ کا ایک سروے شائع ہوا ہے جس کے مطابق پاکستان کی مین سٹریم سیاسی جماعتوں میں سب سے زیادہ مقبولیت پاکستان مسلم لیگ ن کی ہے ،اس فہرست میں دوسرے نمبر پر تحریک انصا ف جبکہ پیپلز پارٹی کا تیسرا نمبر ہے ۔مسلم لیگ ن کی مقبولیت 36فیصد ،تحریک انصاف کی مقبولیت 24فیصد اور پیپلز پارٹی کی مقبولیت 17فیصد ہے۔
