اسلام آباد (مانیٹرنگ ڈیسک) کرپٹ سیاستدانوں کو باکسنگ رنگ میں عامرخان کے حوالے کروں گا۔چیف جسٹس کی خیبرپختونخواہ آمد باعث خوشی، ان کی سمت درست ہے، تحریک انصاف کے چیئرمین عمران خان کالندن میں تقریب سے خطاب ، مانچسٹر میں میڈیا سے گفتگو ۔ تفصیلات کے مطابق پاکستان تحریک انصاف کے چیئرمین عمران خان لندن پہنچ گئے ہیں جہاں انہوں نے ایک

تقریب سے خطاب کرتے ہوئے کہا ہے کہ کرپٹ سیاستدانوں کو باکسنگ رنگ میں عامرخان کے حوالے کروں گا، چیف جسٹس کی سمت درست ہے، وہ عام آدمی کے مسائل سن رہے ہیں، عمران خان نے چیف جسٹس کی خیبرپختونخوا آمد کو باعث خوشی قرار دیا۔ ان کا کہنا تھا کہ پختونخوا میں افسر شاہی کی تقرریوں کی بنیاد اہلیت اور قابلیت ہے جب کہ چیف جسٹس نے بھی صوبائی انتظامیہ کی تعریف کی۔عمران خان نے مزید کہا کہ اقتدار میں آئے تو اداروں کی اصلاح کے لیے بیرون ملک مقیم پاکستانیوں سےخدمات لیں گے۔مانچسٹر میں میڈیا سے گفتگو کرتے ہوئے عمران خان نے 2013کے پاکستانی الیکشنوں کو ایک بار پھر متنازعہ قرار دیا۔ عمران خان نے کہا کہ گزشتہ انتخابات میں دو جماعتوں کے مک مکا سے آنے والا نگراں سیٹ اپ صاف شفاف الیکشن نہیں کراسکا، اس بار ایسی حکومت آنی چاہیے جو منصفانہ انتخابات کراسکے۔ عمران خان کا کہنا تھا کہ آصف زرداری اور نواز شریف سے اتحاد نہیں ہو گا، پیپلزپارٹی اور (ن) لیگ نے میثاق جمہوریت اور اٹھارھویں ترمیم کے تحت مک مکا کیا، نگراں حکومت اور الیکشن کمیشن میں مرضی کے لوگ لگائے، ان دونوں جماعتوں سے اتحاد نہیں کریں گے۔چیئرمین تحریک انصاف نے کہا کہ عوام کے ووٹ لے کر جنہوں نے خود کو نیلام کیا ہارس ٹریڈنگ کے اصل ذمہ دار وہ ہیں، چوہدری سرور کو اپوزیشن اور تحریک انصاف میں شامل ہونے والے (ن) لیگ کے اراکین نے بھی ووٹ دیے۔