اسلام آباد (مانیٹرنگ ڈیسک)صدر مملکت ممنون حسین نے کہا ہے کہ ہرادارہ اپنی حدود میں کام کرے گا تو کسی کو شکایت نہیں ہوگی ،جو دولت باہر ہے ضروری نہیں ساری لوٹی ہوئی ہو، کسی مخصوص آدمی کو ٹارگٹ کرنا مناسب بات نہیں، سیاسی جماعتوں کو خود مل کر ملک کے مفاد میں کام کرنا چاہئے، منی لانڈرنگ الزامات سے بچنے کیلئے ٹیکس ایمنسٹی سکیم دی ، عام انتخابات وقت پر ہونگے۔
پیر کو صدر مملکت ممنون حسین خاتون اول کے ہمراہ پاسپورٹ آفس پہنچے اس موقع پر انہوں نے پاسپورٹس کیلئے درخواست پراسیس کروائی بعد ازاں میڈیا سے بات چیت کرتے ہوئے صدر مملکت نے کہا کہ پاسپورٹ آفس کے انتظامات اچھے تھے۔ انہوں نے کہا کہ یہ پتہ نہیں کہ معمول میں بھی ایسے انتظامات ہوتے ہیں ۔ انہوں نے کہا کہ پاکستانیوں کو ایسے ملک نہیں جانا چاہئے جہاں ان کی عزت نہیں۔صدر مملکت نے کہا کہ سیاسی جماعتوں کو خود مل کر کام کرنا چاہئے جو ملکی مفاد میں ہو۔ انہوں نے کہا کہ میں نہیں سمجھتا کہ کوشش بھی کروں اور سیاسی جماعتیں مل کر بیٹھ جائیں۔ صدر مملکت نے کہا کہ سیاستدان سب سمجھدار لوگ ہیں ،سیاستدان بچے تو نہیں کہ انہیں سمجھایا جائے۔ صدر مملکت نے کہا کہ ہر ادارے کو اپنی حدود میں رہ کر کام کرنا چاہئے ہر ادارہ اپنی حدود میں کام کرے گا تو کسی کو شکایت نہیں ہوگی۔ انہوں نے کہا کہ سی پیک اور ملکی ترقی میں ہر ایک کو اپنا کردار ادا کرنا چاہئے۔ایسے عمل میں حصہ نہیں لینا چاہئے جس سے ملک کی ترقی میں رکاوٹ ہو۔ صدر نے کہا کہ جو دولت باہر ہے ضروری نہیں ساری لوٹی ہوئی ہو۔ بیشمار لوگوں کی اپنی دولت بھی ہے ۔ انہوں نے کہا کہ سب کیلئے کہنا غلط ہے کہ انہوں نے لوٹی ہوئی دولت باہر بھیجی۔ صدرمملکت نے کہا کہ سینکڑوں لوگوں کے باہر کے ممالک میں اپنے مکانات ہیں، کسی مخصوص آدمی کو ٹارگٹ کرنا مناسب بات نہیں۔ صدر مملکت نے کہا کہ منی لانڈرنگ الزامات سے بچنے کیلئے ٹیکس ایمنسٹی سکیم دی ۔ ٹیکس ایمنسٹی سکیم صرف پاکستان میں نہیں بہت سے ممالک میں ہے ۔ نجی ٹی وی کے مطابق انہوں نے کہا کہ سپریم کورٹ نے کسی کو توہین عدالت میں سزا دی اور کسی کو مناسب سمجھتے ہوئے نہیں دی کنفیوژن خود بخود ختم ہوجاتی۔ ایک سوال پر صدر نے کہا کہ عام انتخابات وقت پر ہونگے۔
