اسلام آباد (مانیٹرنگ ڈیسک) اسلام آباد ہائی کورٹ کے جسٹس عامر فاروق نے امریکی سفارتخانے کے ملٹری اتاشی کرنل جوزف کی گاڑی کی ٹکر سے شہری عتیق بیگ کی ہلاکت کے حوالے سے کرنل جوزف کا نام ای سی ایل میں شامل کرنے کی درخواست پر وزارت داخلہ اور دیگر فریقین کو نوٹس جاری کرتے ہوئے سماعت ملتوی کر دی ۔ جمعرات کو فاضل جسٹس نے

امریکی سفارتخانے کے ملٹری اتاشی کرنل جوز ف کی گاڑی کی ٹکر سے جاں بحق ہونے والے 22سالہ عتیق بیگ کے والد محمد ادریس کی درخواست پر سماعت کی تو درخواست گزار کے وکیل عمر اعجاز گیلانی ایڈووکیٹ عدالت میں پیش ہوئے ، فاضل جسٹس نے استفسار کیا کہ عدالت کو ای سی ایل میں نام ڈالنے کے حوالے سے قانونی نقطہ بتائیں ،وکیل نے کہاک ہ کرنل جوزف ایک سفارتکار ہیں جنیوا کنونشن کے تحت کارروائی کی جائے،نشے سے مخمور کرنل جوزف نے عتیق بیگ کو گاڑی کی ٹکر مار کر قتل کیا ،کرنل جوزف کی گاڑی کی ٹکر سے عتیق بیگ جاں بحق جبکہ اس کا کزن راحیل شدید زخمی ہوا،وکیل نے کہا کہ پولیس نے میڈیا کے دباؤ سے مقدمہ درج کیا لیکن تحقیقات مکمل کرنے کی کوئی سنجیدہ کوشش نہیں کی جا رہی، عدالت پولیس کو شفاف تحقیقات کر کے ملزم کو گرفتار کرنے کا حکم دے اور کرنل جوزف کا نام ای سی ایل میں شامل کیا جائے ۔ درخواست میں کرنل جوزف، ایس ایچ او کوہسار، آئی جی اسلام آباد اور سیکرٹری داخلہ کو فریق بنایا گیا ہے ۔ عدالت نے ابتدائی دلائل سننے کے بعد فریقین کو نوٹس جاری کرتے ہوئے جواب طلب کر لیا ۔