اسلام آباد(مانیٹرنگ ڈیسک)سابق وزیراعظم نوازشریف نے مقدمات سے بچنے کیلئے سابق صدرآصف علی زرداری کی طرح روحانی شخصیت کی خدمات حاصل کرلیں۔نجی ٹی وی اے آر وائی نیوز نے ذرائع کے حوالے سے اپنی رپورٹ میں انکشاف کیا ہے کہ سابق وزیراعظم نواز شریف نے سابق صدر آصف علی زرداری کی طرح مقدمات سے بچنے کیلئے ایک روحانی شخصیت کی
خدمات حاصل کر لی ہیں اور اس شخصیت کا نام مولوی نعیم بٹ ہے جو کہ احتساب عدالت میں سابق وزیراعظم نواز شریف کے ہمراہ آتے ہیں ،مولوی نعیم بٹ کونوازشریف کے ہمراہ کمرہ عدالت تک رسائی حاصل ہے اور انہیں خاص پروٹوکول بھی دیا جاتا ہے۔ مولوی نعیم بٹ سابق وزیراعظم کی پیشی کے موقع پر کمرہ عدالت میں چکر لگاتے ہوئے مختلف تسبیحات بھی کرتے ہیں۔یاد رہے کہ پیپلزپارٹی کے شریک چیئرمین اور سابق صدر آصف علی زرداری نے بھی مقدمات سے نجات کیلئے پیر اعجاز شاہ کی خدمات حاصل کر رکھی تھیں جو آصف زرداری کی مقدمات کے وقت پیش ہوتے تھے اور کمرہ عدالت کے باہر ورد کرتے ہوئے چکر لگاتے رہتے تھے۔خیال رہے کہ آصف زرداری عدالتوں میں زیرسماعت اپنے تمام مقدمات میں باعزت بری ہو چکے ہیںجس سے متعلق کہا جاتا ہے کہ آصف زرداری کی مقدمات سے باعزت بری ہونے کے پیر اعجاز شاہ کے وظائف اور تسبیحات کی کرامت ہے۔ واضح رہے کہ احتساب عدالت میں گزشتہ روز 10روز تک نواز شریف کے وکیل خواجہ حارث نے جے آئی ٹی سربراہ اور ایون فیلڈ ریفرنس کے اہم گواہ واجد ضیا پر اپنی جرح مکمل کی ہے۔ اس جرح کے دوران واجد ضیا کئی موقعوں پر بوکھلاہٹ کا شکار ہوئے یا انہیں کئی باتیں یاد ہی نہیں رہیں۔ اس کے علاوہ وہ جرح کے دوران سابق وزیراعظم نواز شریف کے خلاف ریفرنس میں ایسے بیان دے چکے ہیں جس سے نواز شریف کے موقف کو بڑی حد تک تقویت حاصل ہوئی ہے۔
