اسلام آباد(آئی این پی ) وفاقی وزیرداخلہ احسن اقبال نے کہا ہے کہ امریکی سفارتکار نے واضح طور پر ٹریفک قانون توڑا ،اسکے باعث نوجوان جاں بحق ہوا، واقعہ کا مقدمہ درج ہوچکا ہے،وزارت خارجہ معاملہ امریکی سفیرکے سامنے اٹھائیگا۔ اتوار کو سماجی رابطے کی ویب سائٹ ٹوئٹر پر ا پنے پیغام میں اسلام آباد میں امریکی سفارتکار کی گاڑی کی ٹکر سے نوجوان کے جاں بحق ہونے پر اظہار افسوس
کی کرتے ہوئے کہا ہے کہ امریکی سفارتکار نے واضح طور پر ٹریفک قانون توڑا جس کے باعث نوجوان جاں بحق ہوا۔انھوں نے بتایا واقعہ کا مقدمہ درج ہوچکا ہے جبکہ وزارت خارجہ سے معاملہ امریکی سفیر کے ساتھ اٹھانے کا کہہ دیا ہے۔واضح رہے کہ گزشتہ روز اسلام آباد میں امریکی سفارتخانے کے ملٹری اتاشی نے سگنل توڑتے ہوئے موٹرسائیکل کو ٹکر ماردی تھی جس کے باعث نوجوان جاں بحق جبکہ اس کے کزن زخمی ہوگیاتھا۔
