اسلام آباد(نیوزڈیسک)وزیراعظم شاہد خاقان عباسی بغیر پروٹوکول کے سپریم کورٹ پہنچے جواب میں چیف جسٹس ثاقب نثار کا بھی بھرپور خیر مقدم،ملاقات کی تفصیلات منظر عام پر آگئیں، تفصیلات کے مطابق وزیراعظم شاہدخاقان عباسی، چیف جسٹس آف پاکستان جسٹس ثاقب نثار سے ملاقات کے لیے بغیر پروٹوکول سپریم کورٹ میں پہنچ گئے اور اس ملاقات کو غیرمعمولی قرار دیا جارہا ہے۔وزیراعظم شاہد خاقان عباسی بغیر پروٹوکول سپریم کورٹ پہنچے تو چیف جسٹس نے دروازے پر ان کا استقبال کیا

اور دونوں کے درمیان ملاقات شروع ہوئی۔بتایاجارہاہے کہ ملاقات میں باہمی دلچسپی کے امور اور قانونی اصلاحات کے بارے میں تبادلہ خیال کیاگیا، ملاقات کے موقع پر سیکورٹی کے سخت انتظامات کئے گئے ہیں، واضح رہے کہ یہ پہلی بارہے جب چیف جسٹس میاں ثاقب نثار وزیراعظم شاہد خاقان عباسی سے ملاقات کر رہے ہیں۔سپریم کورٹ کے ترجمان نے تصدیق کی ہے ،یہ ملاقات ایک ایسے وقت پر ہو رہی ہے جب ملک میں عدلیہ اور حکومت کے مابین تناؤ کی سی کیفیت ہے۔واضح رہے کہ سینئر صحافی چوہدری غلام حسین نے گزشتہ روز ہی نجی ٹی وی کے ایک پروگرام میں انکشاف کیا ہے کہ وزیراعظم شاہد خاقان عباسی چیف جسٹس ثاقب نثار سے ہر صورت ملاقات کرنا چاہتے ہیں اور اس سلسلے میں انہوں نے اٹارنی جنرل اشتر اوصاف کے ذمے لگایاہوا ہے کہ آپ میری ہر صورت چیف جسٹس سے ملاقات کا بندوبست کریں، انہوں نے دعویٰ کیا کہ چیف جسٹس کا کیا کام ہے کہ وزیراعظم ان سے ملنے کی درخواستیں کررہے ہیں؟ انہوں نے کہا کہ یہ لوگ عدالتوں کو گالیاں بکتے ہیں اور پھر ملاقات کی خواہش کا اظہاربھی کرتے ہیں، واضح رہے کہ شاہد خاقان عباسی چیئرمین سینٹ کے انتخاب پر کافی اعتراضات کرچکے ہیں اور انہوں نے چیئرمین سینٹ کو بدلنے کی خواہش کا بھی اظہار کیا ہے ۔چوہدری غلام حسین نے گزشتہ روز ہی دعویٰ کیا تھا کہ یہ بہت بڑی خبر ہے کہ وزیراعظم چیف جسٹس ثاقب نثار سے ملنا چاہتے ہیں اور انہوں نے اس سلسلے میں اٹارنی جنرل کو ہدایات جاری کی ہیں۔