اسلام آباد/کوئٹہ (این این آئی)بلوچستان کی وکلاء برادری نے سپریم کورٹ کے جسٹس قاضی فائز عیسیٰ کی بطور چیف جسٹس بلوچستان ہائی کورٹ تقرری کے خلاف درخواست کی سماعت پر تحفظات کا اظہار کردیا۔نجی ٹی وی کے مطابق بلوچستان بار کونسل کی جانب سے جسٹس قاضی فائز عیسیٰ کے خلاف ایڈووکیٹ ریاض راہی کی درخواست پر نہ صرف تحفظات کا اظہار کیا گیا بلکہ ان کی جانب سے اس معاملے پر بار ایسوسی ایشن کے تمام نمائندگان کی کانفرنس بلانے پر غور کیا جارہا۔
اس حوالے سے بلوچستان بار کونسل کے وائس چیئرمین حاجی عطااللہ نے بتایا کہ جسٹس قاضی فائز عیسیٰ نے مختلف حلقوں کی کمزوریوں کو نمایاں کرنے میں اہم کام کیا جبکہ وہ 8 اگست 2016 کو ہونے والے سانحہ کوئٹہ کی تحقیقات کرنے والے ایک رکنی کمیشن کے سربراہ بھی تھے۔انہوں نے کہا کہ بار کونسل معزز جج کے خلاف اس اقدام پر ایک قرارداد بھی منظور کرنے کا سوچ رہی ہے تاہم اس بارے میں حتمی تاریخ بار ایسوسی ایشن کے نمائندگان کی کانفرنس میں کیا جائیگا۔